Toshkent shahrida yoritgich ustuniga toʻqnashgan Cobalt yonib ketdi. Bu haqda shahar IIBB YHXB axborot xizmati xabar berdi.

Maʼlum qilinishicha, hodisa kecha, 3-sentyabr kuni soat 21:00 larda Mirobod tumani Fargʻona yoʻli koʻchasida sodir boʻlgan. 2002-yilda tugʻilgan S.X. Cobalt rusumli transport vositasida harakatlanish vaqtida rul boshqaruvini yoʻqotib, yoritgich ustuniga borib urilgan. Oqibatda avtomashinada yongʻin kelib chiqqan.

Yongʻin tuman FVB xodimlari tomonidan bartaraf etilgan. Hodisa oqibatida ogʻir tan jarohati olganlar yoʻq, deyiladi xabarda.

Qoʻshimcha qilinishicha, hozirda mazkur hodisa yuzasidan YHXB hamda FVB xodimlari tomonidan surishtiruv olib borilib, zarar miqdoriga aniqlik kiritilmoqda.