Majburiy ovoz to‘plangan “Ochiq byudjet” loyihalari ovoz berish bosqichidan chetlatiladi

Moliya vazirligi Quva tumanidagi maktabda o‘qituvchilarni ovoz berishga majburlash holati aniqlangandan so‘ng bunday qaror qabul qildi.

Majburiy yo‘l bilan ovoz berilgan “Ochiq byudjet” loyihalari ovoz berish bosqichidan chiqarib tashlanadi, deb xabar qilmoqda Moliya vazirligining matbuot xizmati.

Vazirlik ma’lumotlariga ko‘ra, Farg‘ona viloyati Quva tumanidagi 37-maktab xodimlarini “Ochiq byudjet” loyihasi uchun ovoz berishga majburlashgan. Huquq-tartibot organlari tekshiruv o‘tkazib, qonunbuzarlik faktini tasdiqladi.

Shu munosabat bilan Moliya vazirligi majburiy ovoz to‘plangan loyihalarni ovoz berish bosqichidan chiqarib tashlash talabi bilan xalq deputatlari tuman Kengashiga taqdimnoma yubordi. Vazirlik shuningdek, majburiy ovoz yig‘ish holatlari bilan to‘qnash kelgan fuqarolar 71 200-06-00 telefon raqamiga murojaat qilishlari mumkinligini eslatib o‘tdi.

NOVA24 Instagramʼda. Obuna boʻling
Asosiy yangiliklar va qiziqarli videolar