Madaniyat vaziri yana reklama roligida ko‘rinish berdi
Ozodbek Nazarbekov yoshlarni xususiy OTMga kirishga targ‘ib qildi.
O‘zbekiston madaniyat vaziri Ozodbek Nazarbekov yana bir marta reklamada — bu safar Kokand University`ning roligida chiqish qildi.
Videoda vazir OTMning Andijon filialiga o‘qishga kirishga targ‘ib qilmoqda. “Gazeta.uz”ning yozishicha, Raqobatni rivojlantirish va iste’molchilar huquqlarini himoya qilish qo‘mitasi holatni reklama qonunchiligi doirasida o‘rganmoqda.
Eslatib o‘tamiz, “Reklama to‘g‘risida”gi qonunning 16-moddasiga ko‘ra, tovar yoki xizmat davlat organlari yoki ularning mansabdor shaxslari tomonidan ma’qullanganligini ko‘rsatish taqiqlanadi. “Davlat fuqarolik xizmati to‘g‘risida”gi qonunning 13-moddasida esa mansabdor shaxslarga pedagogik, ilmiy va ijodiy faoliyatdan tashqari haq to‘lanadigan boshqa turdagi faoliyat bilan shug‘ullanish, bundan qonunlar va prezident qarorlarida nazarda tutilgan hollar mustasno, shuningdek, jismoniy va yuridik shaxslardan ularning manfaatlarini ko‘zlab o‘z xizmat vakolatlarini bajarganlik yoki bajarmaganlik uchun biron-bir mukofot, naf yoki sovg‘alar olish taqiqlanadi.
Eslatib o‘tamiz, 2023-yilning may oyida madaniyat va turizm vaziri Ozodbek Nazarbekovning noqonuniy biznesi aniqlangandi. Antikor vaziyat bilan qiziqdi. Shov-shuvdan so‘ng ta’sischi o‘zgartirilgan.
Izohlar