Jazirama quyosh va changli shamol: Sinoptiklar haftalik ob-havoni bashorat qilishdi
O‘zbekistonliklarga quyoshda kamroq yurish tavsiya qilindi.
“O‘zgidromet” xabariga ko‘ra, 21–24-iyul kunlari O‘zbekiston hududining katta qismida quruq va issiq ob-havo saqlanib turadi. Kunduzi havo harorati yuqori bo‘ladi, ba’zi joylarda shamol tezlashib, chang-to‘zonlar kuzatiladi, deya xabar berdi O‘zgidromet.
21-iyulda respublikaning barcha hududlarida asosan ochiq va quruq ob-havo bo‘lishi kutilmoqda. Shamol sharqdan 7-12 metr/sekund tezlikda esadi, ba’zi joylarda 18 metr/sekundgacha kuchayishi mumkin. Ayrim joylarda chang-to‘zonlar kuzatilishi mumkin. Kunduzi havo harorati 37-42 darajagacha, janubda va cho‘l hududlarda 44 darajagacha ko‘tariladi.
22–23-iyul kunlari ob-havo sharoitida sezilarli o‘zgarishlar bo‘lmaydi. Issiq va quruq ob-havo kutilmoqda. Kunduzgi harorat 38-43 daraja atrofida saqlanib turadi. Sharqdan sekundiga 20 metr tezlikda esayotgan shamol ba’zi joylarda kuchayib, chang-to‘zonlar kuzatilishi mumkin.
24-iyulda ham yog‘ingarchilik kutilmaydi. Havo harorati biroz pasayadi, kunduzi termometr ustunchalari 38-40 daraja, kechasi 22-28 daraja atrofida bo‘ladi. Shamol sharqdan esadi, ba’zi joylarda chang-to‘zonlar bilan birga sekundiga 20-22 metrgacha kuchayishi mumkin.
Toshkentda butun ish haftasi davomida poytaxtda havo ochiq va yog‘ingarchiliksiz bo‘ladi. Havo harorati kunduzi 38-40 daraja, kechasi 24-26 daraja bo‘ladi. Sharqdan sekundiga 10 metr tezlikda shamol esadi.
Mutaxassislar aholiga yuqori haroratda ehtiyot choralarini ko‘rishni tavsiya qiladi: quyoshda uzoq vaqt qolmaslik, bosh kiyim kiyish va ko‘proq suv ichish.
Izohlar