Janubiy Koreyadagi oʻzbekistonliklardan mitinglarga bormaslik va hushyorlikni saqlash soʻraldi

Elchixona favqulodda vaziyatlarda qoʻngʻiroq qilish mumkin boʻlgan raqamlar bilan boʻlishdi.

Oʻzbekistonning Janubiy Koreyadagi elchixonasi vatandoshlarni namoyish va mitinglarda ishtirok etmaslikka, hushyorlikni saqlashga chaqirdi.

Shuningdek, vatandoshlardan odamlar gavjum joylarga bormaslik, borgan mamlakatining qonun-qoidalariga hurmat bilan qarash, mahalliy hokimiyat koʻrsatmalariga amal qilish soʻralgan.

Favqulodda vaziyatlar yuzaga kelganda fuqarolar quyidagi raqamlarga murojaat qilishlari mumkin: +82 10 3213 4505, +82 10 2909 4334, +82 2 574 6554.

4-aprel kuni Koreya Konstitutsiyaviy sudi prezident Yun Sok Yolga nisbatan impichment ishi boʻyicha qaror chiqaradi. Yigʻilish ochiq formatda boʻlib oʻtadi va jonli efirda namoyish etiladi. Yun Sok Yol oʻz lavozimida qolish-qolmasligini sud hal qiladi. Shu munosabat bilan mamlakatda mitinglar oʻtkazilishi mumkin.

NOVA24 YouTubeʼda. Obuna boʻling
Asosiy yangiliklar va qiziqarli videolar