Janubiy Koreyadagi noqonuniy muhojirlar o‘z vataniga jarimalarsiz qaytishi mumkin
Mamlakatda fevral oyining oxirigacha davom etadigan vaqtinchalik maxsus rejim joriy etildi.
Janubiy Koreya Adliya vazirligi mamlakatda noqonuniy bo‘lib turgan xorijliklar uchun ixtiyoriy ravishda chiqib ketish bo‘yicha maxsus rejim ishga tushirilganini e’lon qildi.
Dastur 2025-yil 1-dekabrdan 2026-yil 28-fevralgacha amal qiladi. U o‘z maqomi haqida xabar bergan va o‘z tashabbusi bilan mamlakatni tark etgan noqonuniy shaxslarga jarimalardan qochish imkonini beradi. Bundan tashqari, rejim amal qilish davrida ilgari jarimalar to‘langandan keyingina olib tashlangan kirish taqiqi vaqtincha to‘xtatiladi.
Dasturdan foydalanish uchun xorijliklar ketishdan 3-15 kun oldin mahalliy immigratsiya boshqarmasiga xabar berishlari yoki HiKorea portali orqali onlayn ariza topshirishlari kerak. Arizada shaxsiy ma’lumotlar, yashash manzili, uchish sanasi, jo‘nab ketish aeroporti va reys raqami ko‘rsatilishi kerak.
Uchish kunida aeroport yoki portning immigratsiya postida sudlanganlik va qidiruv bo‘yicha qayta tekshiruvdan o‘tish kerak. Ixtiyoriy ravishda ketish uchun ariza, pasport va aviachipta taqdim etish talab etiladi. Ma’lum qilinishicha, dastur amal qilish davrida mamlakatda noqonuniy bo‘lish ustidan nazorat kuchaytiriladi.
Reydlar chog‘ida qo‘lga olingan xorijliklarni kuchaytirilgan choralar kutmoqda — majburiy chiqarib yuborish va mamlakatga kirishni taqiqlashgacha. Qo‘shimcha ma’lumotlarni xorijliklar uchun yagona maslahat markazi — 1345 raqami orqali olish mumkin, — deyiladi xabarda.
Eslatib o‘tamiz, Janubiy Koreyada terrorchilarni moliyalashtirishda gumonlanayotgan o‘zbekistonlik qo‘lga olingandi. Ekstremistlarga yo‘naltirilgan mablag‘lar orasida ushbu summa mamlakatdagi eng yirik miqdor.
Izohlar