Хоразм вилоятида чиқинди хизмати учун тарифлар оширилди

Эндиликда Урганч шаҳри ва Урганч тумани аҳолиси хизмат учун бир ойда 5880 сўм, Хива шаҳри ва вилоятнинг бошқа туманлари аҳолиси эса 4592 сўм тўлайди.

Хоразм вилоятида қаттиқ ва суюқ маиший чиқиндиларни тўплаш ва олиб чиқиб кетиш бўйича кўрсатиладиган хизматлар учун ягона тўлов тарифлари тасдиқланди. Бу ҳақда Санитар тозалаш ишларини ташкил этиш республика маркази хабар берди.

Унга кўра:

• Урганч шаҳри ва Урганч тумани бўйича аҳоли учун 5880 сўм (аввал 3500 сўм эди) ҳамда юридик шахсларга 1 м куб учун 80 640 сўм (ҚҚС билан, аввал 48 000 сўм эди) тўлов миқдори белгиланди.
• Хива шаҳри ва вилоятнинг бошқа туманларида эса аҳоли учун 4592 сўм (2300 сўм) ҳамда юридик шахслар учун 64 400 сўм (ҚҚС билан, аввал 32 000 сўм эди) тўлов тарифлари миқдори тасдиқланди.

Аввалроқ Қорақалпоғистон Республикаси ҳамда Тошкент, Қарши шаҳарлари ва Тошкент, Бухоро, Наманган, Самарқанд, Фарғона, Андижон, Жиззах, Сирдарё, Сурхондарё вилоятларида қаттиқ маиший чиқиндиларни тўплаш ва олиб чиқиб кетиш бўйича кўрсатиладиган хизматлар учун ягона тўлов тарифлари белгиланганди.

NOVA24 YouTubeʼda. Obuna boʻling
Asosiy yangiliklar va qiziqarli videolar