G‘ayrat Fozilov Lyuksemburg valiahd Buyuk gersogiga ishonch yorliqlarini topshirdi

Marosim doirasida bo‘lib o‘tgan suhbatda valiahd Buyuk gersog O‘zbekiston bilan munosabatlarni rivojlantirishdan manfaatdor ekanini bildirgan.

7 yanvar kuni O‘zbekiston elchisi G‘ayrat Fozilov (qarorgohi Bryussel shahrida) valiahd Buyuk gersogi Giyom (Vilgelm)ga ishonch yorliqlarini topshirdi.

Qayd etilishicha, marosim doirasida bo‘lib o‘tgan suhbatda valiahd Buyuk gersog O‘zbekiston bilan munosabatlarni rivojlantirishdan manfaatdor ekanini bildirgan. Muloqot chog‘ida, shuningdek, ikki tomonlama munosabatlarni rivojlantirish istiqbollari atroflicha muhokama qilingan.

Suhbat so‘ngida Lyuksemburg valiahd Buyuk gersogi O‘zbekiston elchisini mas’uliyatli lavozimga tayinlangani bilan tabriklab, uning ikki mamlakat o‘rtasida hamkorlikni chuqurlashtirishga qaratilgan faoliyatini qo‘llab-quvvatlashga tayyorligini bildirgan.

G‘ayrat Fozilov O‘zbekistonning Belgiyadagi, shuningdek, o‘rindoshlik asosida Niderlandiya va Lyuksemburgdagi (qarorgohi Bryussel shahrida) elchisi, Yevropa Ittifoqi va NATO huzuridagi vakolatxonalari rahbari hisoblanadi.

NOVA24 Instagramʼda. Obuna boʻling
Asosiy yangiliklar va qiziqarli videolar