Davlat rahbarlari o‘zbekistonliklarni Mustaqillik kuni bilan tabrikladi
Xalqaro tashkilotlar — SHHT, MDH, IHT va BMT rahbarlari ham o‘z qo‘llab-quvvatlashini izhor qildi.
Shavkat Mirziyoyev nomiga mamlakat mustaqilligining 34 yilligi munosabati bilan tabriklar kelmoqda, deb xabar bermoqda “Dunyo”.
Davlat rahbarlarining maktublarida O‘zbekiston Shavkat Mirziyoyev rahbarligida ulkan ijtimoiy-iqtisodiy yutuqlarga erishayotgani, xalqaro maydondagi nufuzi mustahkamlanib borayotgani, mintaqaviy va global siyosatda tobora sezilarli o‘rin tutayotgani qayd etilgan.
Birinchilardan bo‘lib Rossiya prezidenti Vladimir Putin, Xitoy raisi Si Szinpin, AQSH prezidenti Donald Tramp, Qozog‘iston prezidenti Qosim-Jo‘mart To‘qayev, Turkiya prezidenti Rajab Toyyib Erdo‘g‘on, shuningdek, Qirg‘iziston, Tojikiston va Turkmaniston yetakchilari tabrik yo‘llagan.
Yevropa Ittifoqi, Germaniya, Italiya, Hindiston, Eron, Pokiston, Janubiy Koreya, Yaponiya, Saudiya Arabistoni, BAA, Misr va boshqa ko‘plab davlatlar rahbarlari ham tabrik yo‘llagan. Xalqaro tashkilotlar — SHHT, MDH, IHT va BMT rahbarlari ham buni qo‘llab-quvvatlashini bildirdi.
Murojaatnomalarda jahon yetakchilari O‘zbekistonda keng ko‘lamli islohotlar muvaffaqiyatli amalga oshirilayotgani, aholi turmush darajasi o‘sib, o‘zaro manfaatli hamkorlik kengayib borayotgani, mamlakat Markaziy Osiyoda barqarorlik va xavfsizlikni mustahkamlashga hissa qo‘shayotganini ta’kidladi.
Eslatib o‘tamiz, biroz avval Shavkat Mirziyoyev SHHT sammitida nutq so‘zlagan edi. Prezident tashkilot doirasidagi ko‘p tomonlama hamkorlikni chuqurlashtirishning ustuvor yo‘nalishlarini ko‘rsatib o‘tgan.
Izohlar