Давлат кадастрлар палатаси Олмалиқ шаҳар филиали бош муҳандиси ушланди

У ер участкасини 3 қисмга бўлиб бериш ҳамда ҳар бир ер участкасига алоҳида кадастр ҳужжатларини расмийлаштириб бериш эвазига фуқародан 4 000 доллар миқдоридаги пулни пора сифатида талаб қилган.

Олмалиқда Давлат кадастрлар палатаси шаҳар филиали бош муҳандиси қўлга олинди. Бу ҳақда Бош прокуратура хабар бермоқда.

Маълум қилинишича, фуқаро С.Ж. Тошкент вилояти ИИБ ЖҚБ Ер ресурслари талон-торож қилинишига қарши курашиш бўлинмасига қилган мурожаатига асосан, вилоят прокуратураси ва ҳуқуқни муҳофаза қилувчи орган ходимлари билан ҳамкорликда тезкор тадбир ўтказилган.

Тадбир жараёнида Давлат кадастрлар палатаси Олмалиқ шаҳар филиали бош муҳандиси А.И. Олмалиқ шаҳрининг Хонобод кўчасида жойлашган 0,28 гектардан иборат ер участкасини 3 қисмга бўлиб бериш ҳамда ҳар бир ер участкасига алоҳида кадастр ҳужжатларини расмийлаштириб бериш эвазига 4 000 АҚШ доллари миқдоридаги пулни пора сифатида талаб қилиб, олдиндан 1 800 АҚШ долларини олиб, кейинчалик қолган 2 200 АҚШ долларини ариза муаллифидан олаётган вақтида ашёвий далиллар билан ушланган.

Мазкур ҳолат юзасидан Департаментнинг вилоят бошқармаси томонидан Жиноят кодексининг 210-моддаси билан жиноят иши қўзғатилиб, дастлабки тергов ҳаракатлари олиб боришга киришилган.

NOVA24 TikTokʼda. Obuna boʻling
Asosiy yangiliklar va qiziqarli videolar