Buxoroda voyaga yetmagan bola va qiz turmush qurgani aniqlandi

Oilalar kelishuvi asosida 16 yoshli bola va 17 yoshli qizning nikoh toʻyi boʻlib oʻtgani aniqlandi. Bolalar ombudsmani ularning ota-onalarini maʼmuriy javobgarlikka tortish choralari koʻrilayotganini maʼlum qildi.

Buxoro viloyatida 16 yoshli bola va 17 yoshli qizning nikoh toʻyi boʻlgani haqida material eʼlon qilindi. Bolalar ombudsmani Surayyo Rahmonova holat kuzatuvga olinganini maʼlum qildi.

Aniqlanishicha, 29-iyun kuni Buxoro shahrida oilalarning oʻzaro kelishuvi asosida 2008-yilda Shofirkon tumanida tugʻilgan A.A. (oʻgʻil bola) va 2007-yilda Qorakoʻl tumanida tugʻilgan R.N.ning (qiz bola) nikoh toʻyi boʻlib oʻtgan. Holat yuzasidan tergovga qadar tekshiruv harakatlari olib borildi, deb taʼkidladi bolalar ombudsmani.

Uning qoʻshimcha qilishicha, 2-iyul kuni voyaga yetmaganlarning ota-onalarini Maʼmuriy javobgarlik toʻgʻrisidagi kodeksning 47−3 moddasi (Nikoh yoshi toʻgʻrisidagi qonunchilikni yoki nikoh tuzish tartibini buzish) bilan maʼmuriy javobgarlikka tortish yuzasidan hujjatlar sudga yuborilgan.

Surayyo Rahmonova Oila kodeksining 15-moddasiga asosan, nikoh yoshi erkaklar va ayollar uchun 18 yosh etib belgilanganini eslatdi. “Bu qonuniy talabning buzilishi bolaning taʼlim olish, sogʻligʻini saqlash hamda jismoniy, aqliy va maʼnaviy uygʻun ravishda kamol topish huquqlariga mutlaqo ziddir”, — deya taʼkidladi u.

NOVA24 TikTokʼda. Obuna boʻling
Asosiy yangiliklar va qiziqarli videolar