Бухорода яшаш уйида ноқонуний майнинг ферма ташкил этган шахс аниқланди
Мазкур ҳолат юзасидан жиноят иши қўзғатилиб, гумонланувчи шахс процессуал тартибда ушланган.
Бош прокуратура томонидан ёқилғи-энергия ресурсларидан ноқонуний фойдаланиш билан боғлиқ ҳолатларни фош этишга қаратилган назорат тадбирлари давом этмоқда. Бу ҳақда идора матбуот хизмати хабар берди.
Хусусан, Бухоро шаҳрида яшовчи фуқаро А.Т. яшаш уйининг қурилиши тугалланмаган биносида умумий фойдаланишдаги электр тармоғига крипто-актив ва майнинг соҳасидаги фаолиятни амалга ошириш учун майнинг қурилмаларини тижорат мақсадларида ноқонуний улаб, 459,3 миллион сўмлик 299,6 минг кВт/соат электр энергиясини ўғирлагани аниқланган.
Мазкур ҳолат юзасидан фуқаро А.Т.га нисбатан Жиноят кодексининг 169-моддаси (ўғрилик) 2-қисми «д» банди билан жиноят иши қўзғатилиб, гумонланувчи шахс процессуал тартибда ушланган. Бу модда билан судланган шахс базавий ҳисоблаш миқдорининг уч юз бараваригача миқдорда жарима ёки икки йилдан уч йилгача ахлоқ тузатиш ишлари ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Мавзуга оид хабарлар:
Тошкент вилоятида яшаш хонадонида майнинг ферма ташкил этган шахс ушланди Тошкент шаҳри ва Хоразмда ўз уйида майнинг ферма ташкил этган шахслар аниқланди Сирдарёда 34,3 млрд сўмлик электрдан ноқонуний фойдаланган майнинг ферма аниқланди Зангиотада майнинг ферма ташкил этган шахс давлатга деярли 800 млн сўм зарар етказди Тошкентда ўз уйи ертўласида майнинг ферма ташкил этган шахс аниқланди