Bo‘kada yuk mashinasi yo‘lga o‘tirib olgan shaxsni bosib ketdi

Toshkent viloyatining Bo‘ka tumanida “Isuzu” yuk mashinasi yo‘lga o‘tirib olgan shaxsni urib yubordi.

Toshkent viloyati IIBB YHXB xabar berishicha, tibbiy ekspertiza xulosalariga ko‘ra, ushbu fuqaroning shaxsiga va o‘lim holatiga avtomashina urib ketishi sabab bo‘lganligi ma’lum bo‘ldi. Qochib ketgan haydovchini aniqlash yuzasidan tezkor tadbir o‘tkazildi.

Hodisa sodir bo‘lgan kunning ertasi kuni gumondor va mashina topildi. Gumondor shaxs 1994 yilda Sirdaryo viloyatida tug‘ilgan bo‘lib, hodisani o‘ziga tegishli Isuzu mashinasida sodir qilgani ma’lum bo‘ldi.

“Qorong‘i yo‘lda o‘zimga tegishli o‘ng tomon yo‘lakda 60 tezlikda ketayotgandim. Fuqaro chiziqdan sal beriroqda o‘tirib olgandi. Oldida narsalari sochilib yotgandi. 5 metr masofa qolgandi, aylanib o‘tdim, tegmadi deb o‘ylagandim. Qo‘rqib ketdim, baqirib yubordim. Tegmadi deb o‘ylab ketdim”, deydi hodisani sodir etgan haydovchi.

Holat yuzasidan Jinoyat kodeksining 117 (xavf ostida qoldirish) va 266-moddalariga (transport vositalari harakati yoki ulardan foydalanish xavfsizligi qoidalarini buzish) jinoyat ishi qo‘zg‘atilib, gumondor ehtiyot chorasi sifatida qamoqqa olindi.

NOVA24 TikTokʼda. Obuna boʻling
Asosiy yangiliklar va qiziqarli videolar