Biznes-ombudsman tadbirkorni korrupsiyani tanqid qilgani uchun jazolashni ta’qib deb atadi
Avvalroq tadbirkor qurilish sohasidagi korrupsion sxemalar tarixini oshkor qilgandi, Qurilish vazirligi bunga javoban Ichki ishlar vazirligiga ariza berdi.
Biznes-ombudsman qurilish sohasidagi korrupsiya haqida gapirgan Usmonjon Abdusamatov ustidan Qurilish vazirligining Ichki ishlar vazirligiga qilgan murojaatiga izoh berib, “tadbirkorni tanqid uchun jazolash mumkin emasligini” aytdi.
Biznes-ombudsman arizani tadbirkorga nisbatan ta’qib deb hisoblashini bildirdi. Har bir tadbirkorning erkin faoliyat yuritishi va huquqlariga rioya etilishi qonun bilan kafolatlanganini eslatib o‘tdi. Tadbirkorlarning muammolarini hal qilish biznes-ombudsmanning ustuvor vazifasidir.
Tadbirkorlarning ochiq fikr bildirishlari va tanqidiy mulohazalari hukumat islohotlarini yanada takomillashtirishga va samaradorligini oshirishga xizmat qiladi. Agar tadbirkor soha rivoji yo‘lida fikr bildirsa, bu holat tanqid va jazoga sabab bo‘lmasligi lozim. Aksincha, bunday fikrlar muammolarni hal etish uchun imkoniyat sifatida qabul qilinishi zarur, — deyiladi xabarda.
Shuningdek, tadbirkorlar huquqlari buzilganda yoki faoliyatiga aralashilganda murojaat qilishga chaqirildi. “Yuksalish” harakati rahbari, deputat Bobur Bekmurodovning aytishicha, islohotlarga qaramay, qurilish sohasini hali ham korrupsiyadan butunlay xoli deb bo‘lmaydi.
Deputat Qurilish vazirligini vaziyatni yaxshilash uchun jamoatchilik nazorati mexanizmlaridan foydalanmayotganlikda aybladi.
Vazirlikning jamoatchilik kengashida nodavlat tashkilotlarning atigi ikki vakili bor, garchi prezident farmoniga ko‘ra ular kamida 50 foiz bo‘lishi kerak. Vazirlikni tadbirkor bilan uchrashishga va uning sohadagi muammolarni hal qilish bo‘yicha takliflarini tinglashga chaqiramiz, — dedi u.
Eslatib o‘tamiz, tadbirkor Usmonjon Abdusamatov qurilish sohasi vakillari ishtirokidagi ochiq muloqotda ruxsatnoma olish jarayonida asossiz rad etishlar va korrupsiya holatlari mavjudligi haqida gapirib bergandi.
O‘shanda Qurilish vazirligi tadbirkor Usmonjon Abdusamatovning so‘zlariga huquqiy baho berish va javobgarlik choralarini ko‘rishni so‘rab Ichki ishlar vazirligiga rasmiy bayonot berilganini ma’lum qilgandi. Xabarda aytilishicha, tadbirkor o‘z so‘zlari bilan “jamoatchilik orasida asossiz ma’lumotlarning tarqalishiga” sabab bo‘lgan.
Izohlar