BAA ravvinni o‘ldirgan 3 nafar o‘zbekistonlikni o‘limga hukm qildi

Birlashgan Arab Amirliklari sudi Isroil va Moldova fuqaroligiga ega bo‘lgan ravvin Zvi Koganni o‘ldirgan uch nafar O‘zbekiston fuqarosini o‘lim jazosiga hukm qildi.

Birlashgan Arab Amirliklari sudi isroillik-moldovalik ravvin Zvi Koganni o‘ldirganlikda ayblangan uch o‘zbekistonlikni o‘lim jazosiga hukm qildi, deb xabar bermoqda The Times of Israel. O‘zbekiston Tashqi ishlar vazirligi mazkur xabarni “Nova24”ga tasdiqladi, ammo boshqa tafsilotlar hozircha yo‘q.

BAA IIV oldinroq gumonlanuvchilarning ism-sharifini ma’lum qilgandi: Olimboy Tohirovich (29 yosh), Mahmudjon Abdurahim (29) va Azizbek Komilovich (34).

Davlat tasarrufidagi WAM axborot agentligi Abu-Dabi federal apellyatsiya sudi davlat xavfsizligi palatasida bo‘lib o‘tgan sud jarayonidan so‘ng hukmni e’lon qildi. Unda qotillikka yordam bergan to‘rtinchi shaxs umrbod qamoq jazosi olgani aytiladi.

Isroil va Moldova fuqaroligiga ega bo‘lgan 28 yoshli ravvin Zvi Kogan (Abu-Dabidagi “Xobod” yahudiy diniy harakatining vakili bo‘lib, bir necha yil BAAda yashagan) 2024-yil noyabr oyida Dubayda bedarak yo‘qolgan, uning jasadi bir necha kundan keyin Ummon bilan chegaradosh Al-Ayn shahrida topilgandi.

Dekabr oyida The Wall Street Journal qotillar Koganni o‘g‘irlab ketgani va uni qo‘shni Ummonga olib ketishni rejalashtirgani haqida xabar bergan. Nashr, shuningdek, “ba’zi gumonlanuvchilar” Turkiyaga qochib ketganini bildirgandi. Isroil hukumati ravvinning o‘ldirilishini “aksilsemit terakt harakati” deb atagan.

O‘zbekiston TIV rahbari Baxtiyor Saidov 2024-yil noyabr oyida Isroil elchisi Gideon Lustigga ravvin Zvi Kogan vafoti munosabati bilan hamdardlik bildirgandi. Saidovning o‘shanda o‘zbek tomoni tergovda har ikki davlat — BAA va Isroil rasmiylari bilan hamkorlik qilayotganini ta’kidlagan.

NOVA24 Telegramʼda. Obuna boʻling
Tezkor xabarlar va asosiy voqealar