2025 йилда кўмир қазиб чиқариш ҳажми 10 миллион тоннага етказилиши кутилмоқда

Мутасаддиларга соҳада халқаро стандартларни жорий этиб, кўмир сифатини ошириш, инвестиция лойиҳаларини жадаллаштириш бўйича кўрсатмалар берилди.

Президент Шавкат Мирзиёев 13 май куни кўмир қазиб чиқаришни ошириш режалари тақдимоти билан танишди.

Йиғилишда қайд қилинишича, Ўзбекистонда кўмир захиралари қарийб 2 миллиард тоннани ташкил этади. Кўмир қазиб олиш ҳажми 2016 йилда 4 миллион тоннага яқин бўлган, 2023 йилда 6,5 миллион тоннадан ошган. Инвесторлар жалб қилиниши натижасида 2023 йилда тадбиркорлар томонидан 369 минг тонна кўмир қазиб чиқарилган.

Тақдимотда айтилишича, бу йил кўмир қазиб чиқариш ҳажми 8 миллион тоннага етказилади. Шундан 900 минг тоннаси тадбиркорлар томонидан олинади. «Шарғункўмир» акциядорлик жамиятида йилига 500 минг тонна кўмирни бойитиш ускунаси ишга туширилади.

Сурхондарё, Қашқадарё ва Тошкент вилоятларидаги тўртта майдонда геология ишлари олиб борилмоқда ва келгуси йилда қазиб чиқаришга йўналтирилади. Шу билан бирга, илғор хорижий тажрибани қўллаган ҳолда кўмир қатламларини баҳолаш ва бурғилаш ишлари давом эттирилмоқда. Буларнинг натижасида 2025 йилда кўмир қазиб чиқариш ҳажмини 10 миллион тоннага етказиш режалаштирилган.

NOVA24 Telegramʼda. Obuna boʻling
Tezkor xabarlar va asosiy voqealar