«Бир соатда ҳаммаси ҳал бўлди». Виа Мароканд гуруҳидаги Рашид партнёри Асалнинг кетиши ҳақида

У Асалда пул билан боғлиқ муаммо бўлмаганини, санъат ортидан 2 та уй ва машина олганини таъкидлаган

Виа Мароканд жамоаси аъзоси Асал гуруҳни тарк этди. Рашид партнёрининг кетиши ҳақида гапириб берди.

Рашиднинг сўзларига кўра, бу хабарни биринчи бўлиб Жавлон Шодмоновдан эшитган. Лекин қолишига умид қилган. Бироқ Асалнинг ўзи билан гаплашганидан сўнг у аниқ кетишини тушуниб етган. Шунингдек, Асалда пул билан боғлиқ ҳеч қандай муаммо бўлмаганини, санъат ортидан у 2 та уй ва машина олганини айтиб ўтган.

«Асалга ҳеч нарса қилмади, бироқ тўсатдан бир соатда ҳаммаси ҳал бўлиб кетди. Жавлон акам менга қўнғироқ қилди. Асал билан бундай ҳолатлар олдин ҳам бўлган, бироқ учинчисида ҳақиқатан ҳам кетди. Асал, тўхтанг, партнёримсиз, ҳали қиладиган ишларимиз бор, деб айтдим. Жавлон акам ҳам тушунтирди. Ҳаттоки учинчисида Жавлон акам қўнғироқ қилиб, Асал гуруҳдан кетяпти, дейишганда ҳам умидим бор эди.

Агар унда пул билан боғлиқ муаммо бўлганида мен билардим, чунки иккаламиз ҳам бир хил пул оламиз. Шу вақтга қадар бизда пул билан боғлиқ муаммо бўлмаган. Машина ҳам, уй ҳам олдик. Асал ҳам кам бўлмади — иккита уй, машина олди. Унда умуман пул билан боғлиқ муаммо бўлмади. Бари бир аёл кишининг дардини тушунмас экансиз. У билан гаплашганимда бўлди, энди у қайтмайди деган нарса бўлди. Тенг ярмимни қирқиб ташлагандек бўлишди.

Виа Мароканд гуруҳлар ичида рекорд қўйган. Мен бундай гуруҳни кўрмаганман. Жуда катта меҳнат кетган. Асал билан қадрдон бўлиб, шу гуруҳни кўтардик. Асал кетди, агар мен ҳам кетсам номардлик бўлади. Асалга мен гуруҳни давом эттираман, деб айтдим», — дейди гуруҳ аъзоси Рашид.

NOVA24 TikTokʼda. Obuna boʻling
Asosiy yangiliklar va qiziqarli videolar