Qozogʻistonning Aqtoʻbe viloyatida yashovchi fuqaro oʻzining ichki organlarini 9 million tengega (18,8 ming dollar) sotishga urindi.

Aqtoʻbe viloyati prokuraturasi maʻlumotlariga koʻra, xodimlar internet makonini monitoring qilish davomida qozogʻistonlik fuqaroning oʻz ichki organlarini sotish boʻyicha noqonuniy kelishuvga erishmoqchi boʻlganidan xabar topgan.

25 sentabr kuni prokuratura tashabbusi bilan oʻtkazilgan tezkor-qidiruv tadbirida oʻzining ichki organlarini jami 9 million tengega sotish boʻyicha noqonuniy bitim tuzmoqchi boʻlgan fuqaro Y. ushlandi, deyiladi xabarda.

Holat yuzasidan Jinoyat kodeksining tegishli moddalari bilan tergovga qadar tekshiruv harakatlari olib borilmoqda.

Qozogʻistonda 5 sentabrdan “Odam savdosiga qarshi kurashish toʻgʻrisida”gi qonun kuchga kirgan, uning doirasida Jinoyat kodeksiga jinoyatlarning yangi toifasi — odam savdosi bilan bogʻliq jinoyatlar, shuningdek, “jinsiy xarakterdagi boshqa xizmatlar” degan yangi tushuncha kiritilgan.