Тошкент аэропортида очиладиган меҳмонхона қандай кўринишда бўлади?

Меҳмонхонани соҳа профессионаллари бошқарувига ўтказиш режалаштирилган.

Тошкент аэропортида биринчи марта кичик меҳмонхона пайдо бўлади. «Uzbekistan Airports» унинг суратларини тақдим қилди.

Тез орада стерил зонадаги яна бир блок фойдаланишга топширилади, у ерда ҳаммом, таҳорат олиш ва намоз ўқиш хоналари, «Анжир» бизнес-зали ва Ўзбекистон аэропортларида биринчи бор кичик меҳмонхона очилади.

«Бу шунчаки капсулалар эмас, балки тўлиқ бир кишилик тўшак ва минимал аксессуарлар тўплами — чироқ, кийим илгичи, қўл юки учун жавон, стол бўлган кичик қулай кабиналар бўлади. Бундай кабиналарнинг моҳияти шундан иборатки, йўловчи кутиш вақтида аэропортдан ва транзит зонадан чиқмасдан бир неча соат давомида унда қолиб дам олиши мумкин», — дейилади компания матбуот хизмати хабарида.

Меҳмонхонага ташриф буюрувчилар учун маълумот таблоси, ҳаммом ва душ хонаси тақдим этилади, қабулхона кечаю кундуз ишлайди ва ҳар бир йўловчига самолётга чиқиш учун индивидуал таклифнома тақдим этилади. Меҳмонхона икки қаватда 27 та турар жой билан таклиф этади. Биринчи қаватда шунингдек, қабулхона, ҳаммом ва душ хонаси бўлади. Меҳмонхона яқинда очилган Арт Базаар савдо павильони каби шарқона услубда қурилади. Лойиҳа устида ишлаш учун таниқли дизайнер Бобур Исмоилов таклиф этилган.

NOVA24 Telegramʼda. Obuna boʻling
Tezkor xabarlar va asosiy voqealar