Сотиладиган давлат мулки объектлари ҳақидаги ахборот махсус порталда жойлаштирилади

Порталдан фойдаланиш бепул амалга оширилади. Давлат мулки объектлари тўғрисидаги ахборотларни порталга жойлаштирмасдан, савдога чиқаришга йўл қўйилмайди.

Вазирлар Маҳкамасининг «Давлат мулки объектлари билан савдоларни ўтказиш тўғрисидаги маълумотларни жойлаштириш порталини ташкил этиш чора-тадбирлари тўғрисида»ги қарори қабул қилинди.

Давлат мулки объектлари билан савдоларни ўтказиш тўғрисидаги маълумотларни жойлаштириш портали яратилиб, унда барча давлат мулки объектларини савдога қўйиш ва уларнинг натижалари тўғрисидаги ахборотлар жойлаштириб борилади. Ушбу тизим солиқ органларининг ахборот тизими билан интеграция қилинади.

Портал фаолияти Давлат активларини бошқариш агентлиги томонидан мувофиқлаштирилади, «Электрон онлайн-аукционларни ташкил этиш» АЖ портал фаолиятини ташкил қилиш ва юритиш бўйича оператор ҳисобланади.

Порталдан фойдаланиш бепул амалга оширилади. Бунда давлат мулки объектлари тўғрисидаги ахборотларни порталга жойлаштирмасдан, савдога чиқаришга йўл қўйилмайди.

Давлат органлари ва ташкилотлар порталга давлат мулки объектлари тўғрисидаги ахборотларни (объектнинг умумий тавсифи, қиймати, савдони ўтказиш механизми, шартлари ва бошқалар) савдо ўтказилишидан камида ўн кун олдин тақдим этади. Шунингдек, якуний маълумотлар (ғолиб ҳақидаги маълумотлар, объектнинг реализация қиймати ва бошқалар) савдо натижалари эълон қилинган кундан бошлаб беш кун ичида жойлаштирилиши керак.

Ҳужжат билан қуйидагилар тасдиқланди:

давлат мулки объектлари билан савдоларни ўтказиш тўғрисидаги маълумотларни жойлаштириш порталида эълон қилинадиган ахборотлар рўйхати;

давлат мулки объектлари билан савдоларни ўтказиш тўғрисидаги маълумотларни жойлаштириш порталига ахборот тизимлари интеграция қилинадиган давлат органлари ва ташкилотлар рўйхати.