O‘zbekistonda birjaga chiqarilayotgan benzin hajmi to‘rt barobar oshirildi

Gaz zapravkalar faoliyatiga kiritilayotgan qisqa muddatli cheklov sabab birjaga chiqarilayotgan benzin hajmi to‘rt barobar oshirildi.

Sovuq havo oqimi natijasida ayrim hududlardagi avtomobillarga gaz to‘ldirish kompressor shoxobchalari (gaz zapravkalar) faoliyatiga kiritilayotgan qisqa muddatli cheklov munosabati bilan birja savdolariga chiqarilayotgan avtobenzin hajmi vaqtinchalik ikki karra oshirilgani haqida xabar berilgan edi.

2024 yil 6 dekabr kuniga qadar birja savdolariga chiqarilayotgan Ai-80 benzini hajmi 2000 tonnani tashkil etgan bo‘lsa, ushbu miqdor 10 dekabrdan boshlab o‘rtacha to‘rt barobar oshirilib, hozirgi vaqtda 8000 tonnadan qo‘yib borilmoqda.

Bundan tashqari, Ai-92 avtobenzinini birja savdolarida sotish hajmi ham oshirilib, kunlik 4000 tonnaga yetkazildi.

2024 yil 13 dekabr kuni ham yana 8000 tonna Ai-80 benzini birja savdolariga qo‘yilgan bo‘lib, uning 7780 tonnasi xaridorlar tomonidan sotib olindi.

Birja savdolariga joylashtirilayotgan avtobenzin hajmini talab va taklifdan kelib chiqib yanada oshirish imkoniyati mavjud, deyiladi xabarda.

NOVA24 Instagramʼda. Obuna boʻling
Asosiy yangiliklar va qiziqarli videolar