Март ойида газ, нефть ва бензин қазиб олиш камайди

Март ойида Ўзбекистонда 2023 йилнинг мартига нисбатан газ (-6,5 фоиз) ва нефть (-11,1 фоиз), шунингдек, бензин (-1,6 фоиз) қазиб олиш камайди. Кўмир қазиб олиш эса бироз ошди (+0,9 фоиз).

Ўзбекистонда 2024 йилнинг март ойида газ қазиб олиш 3,89 миллиард куб метргача камайди, дейилади Статистика агентлигининг «Газета.uz» ўрганган саноат ишлаб чиқариши бўйича ҳисоботида.

Йиллик ҳисобда — 2023 йилнинг мартига нисбатан — ишлаб чиқариш 6,5 фоизга ёки 270 миллион куб метрга, жорий йилнинг январидан эса 284,2 миллион куб метрга камайди. Таққослаш учун: 2019 йилнинг март ойида ишлаб чиқариш 5,26 миллиард куб метрни ташкил қилган. Шу тариқа сўнгги беш йил ичида ойлик ишлаб чиқариш ҳажми 1,36 миллиард куб метрга камайди.

Январь-март ойларида ишлаб чиқариш ҳажми 11,6 миллиард куб метрни ташкил этди, бу ўтган йилнинг биринчи чорагига нисбатан 5,9 фоизга ёки 724,8 миллион куб метрга кам. Баҳорнинг биринчи ойида электр энергияси ишлаб чиқариш 6,62 миллиард кВт/соатни ташкил этди, бу ўтган йилнинг март ойига нисбатан 208,6 миллион, февраль ойига нисбатан эса 193,8 миллион кВт/соатга кўпдир.

Эслатиб ўтамиз, мамлакатда ишлаб чиқарилаётган электр энергиясининг қарийб 80−85 фоизи газда ишлайдиган иссиқлик электр станцияларига тўғри келади, бироқ фотоэлектр станцияларининг янги қувватлари ишга туширилиши билан уларнинг улуши камайиб бормоқда.

NOVA24 YouTubeʼда. Обуна бўлинг
Асосий янгиликлар ва қизиқарли видеолар