Yangiyo‘lda 29 yoshli erkak kaltaklandi, ikki gumonlanuvchi qidirilmoqda
Huquq-tartibot idoralari gumonlanuvchilar haqida har qanday ma’lumot berishni so‘radi.
Ijtimoiy tarmoqlarda Yangiyo‘lda (Toshkent viloyati) bir guruh yigitlar ikki erkakni kaltaklayotgani aks etgan video paydo bo‘ldi. Avvalroq jabrlanganlar og‘ir ahvolda shifoxonaga yotqizilgani xabar qilingandi.
Viloyat IIBB rasmiy versiyani taqdim etdi: idora ma’lumotlariga ko‘ra, 9-sentyabr kuni soat 21:00 atrofida ziyofat zali hovlisida ikki nafar ilgari tanish bo‘lgan erkak janjallashib qolgan, ular o‘rtasida mushtlashuv boshlangan, guvohlar ularni ajratishga uringan. Hodisa kuzatuv kameralari tomonidan qayd etilgan.
Barcha ishtirokchilarga nisbatan choralar ko‘riladi, qonuniylik to‘liq ta’minlanadi, — deya ta’kidladi IIBB.
Keyinroq IIV aniqlik kiritishicha, mojaro davomida 29 yoshli shahar fuqarosi 28 yoshli S.Yu. boshchiligidagi guruh tomonidan kaltaklangan. Bezorilik holati bo‘yicha (O‘zbekiston Respublikasi Jinoyat kodeksining 277-moddasi 3-qismi “g” bandi) jinoyat ishi qo‘zg‘atildi. Hujumning bir nechta ishtirokchilari qo‘lga olinib, hibsga olingan.
Ikki nafar gumonlanuvchi — D.K. va A.N. (ikkalasi ham 2000 yilda tug‘ilgan) qidiruvga berilgan. IIV ular haqida ma’lumotga ega bo‘lgan fuqarolardan huquqni muhofaza qiluvchi organlarga xabar berishlarini yoki 102 raqamiga qo‘ng‘iroq qilishlarini so‘raydi. Ariza beruvchilarning anonimligi kafolatlanadi.
Izohlar