Toshkentda Yunusobod bozoridagi gul rastalari buzila boshlandi — video
Ijtimoiy tarmoqlarda bozorni yopishga tayyorgarlik ko‘rilayotgani haqida xabarlar paydo bo‘ldi.
9-sentyabr kuni ijtimoiy tarmoqlarda Yunusobod bozoridagi gul do‘konlari buzilishi haqida xabarlar tarqaldi. Mutasaddi idoralar hozircha hodisa yuzasidan izoh bermadi.
Guvohlarning so‘zlariga ko‘ra, Yunusobod tumanidagi “Universam” bozorini rekonstruksiya qilish jarayoni boshlangan. Loyiha doirasida birinchi bo‘lib gul do‘konlari ochildi. Shu bilan birga, guvohlarning aytishicha, bozor butunlay buzib tashlanadi. Mutasaddi idoralar hozircha bu borada rasmiy izoh bergani yo‘q.
Prezident matbuot xizmati xabariga ko‘ra, Yunusobod dehqon bozori o‘rnida uch qavatli ekobozor quriladi. Uning yonida qo‘shimcha savdo markazi va zargarlik uyi bo‘ladi. Binolar ostida 1000 dan ortiq avtomobilga mo‘ljallangan yer osti avtoturargohi tashkil etiladi. Loyiha doirasida 4-5 mingta yangi ish o‘rni yaratiladi.
Turkiyalik loyihachi yangi binoda ofislar ham joylashishini ma’lum qildi. Umumiy maydoni 20 ming kvadrat metrni tashkil etadi. Bolalar uchun batut markazi ochish rejalashtirilgan. Majmua tomida, taqdimotga ko‘ra, restoranlar joylashadi, daraxt va butalar o‘sadi.
Eslatib o‘tamiz, “Yunusobod” bozori hududining bir qismida rekonstruksiya ishlari 2025-yil 6-mayda boshlangandi. Ilgari hududda 180 ta avtomobilga mo‘ljallangan to‘xtash joylari mavjud edi. Ishlarni amalga oshirish davrida Ahmad Donish ko‘chasi bo‘ylab, shu jumladan yo‘l o‘tkazgich ostida 350 ga yaqin to‘xtash joylari tashkil etildi.
Izohlar