Toshkentda ikkita avtobus va yengil avtomobil YTHga uchradi
Hodisa oqibatida bir nafar ayolga tibbiy yordam ko‘rsatilgan.
Toshkentda 60 yoshli avtobus haydovchisi yo‘l-transport hodisasini keltirib chiqardi, uning ishtirokchilari yana ikkita transport vositasi bo‘ldi, natijada yo‘lovchilardan biri jarohat oldi, deb xabar bermoqda “Toshshahartransxizmat” matbuot xizmati.
Voqea 25-sentyabr kuni Mirzo Ulug‘bek ko‘chasida sodir bo‘lgan. 63-sonli King Long rusumli avtobusning 60 yoshli haydovchisi xavfsiz masofaga amal qilmay, oldinda harakatlanib ketayotgan 151-sonli Yutong rusumli avtobus bilan to‘qnashgan va u ham inersiya bilan o‘zidan oldinda harakatlanib ketayotgan Onix rusumli yengil avtomobilga borib urilgan.
Oqibatda 63-sonli avtobusning 46 yoshli yo‘lovchisi qo‘rquv va kuchli stress tufayli kasalxonaga yotqizilgan. To‘qnashuv oqibatida ikkala avtobus ham texnik shikastlangan. Hozirda mutaxassislar tomonidan surishtiruv ishlari olib borilmoqda.
Avvalroq Toshkentda BYD, Lacetti va Mercedes-Benz haydovchilari YTH sodir etgani haqida xabar berilgandi. Yo‘lovchilardan biriga tibbiy yordam kerak bo‘lgan.
Izohlar