Toshkentda avtobus haydovchisi piyodalar o‘tish joyida yosh qizni urib yubordi
Jabrlanuvchiga birinchi tibbiy yordam ko‘rsatilgan, haydovchilardan esa ehtiyot bo‘lish so‘ralgan.
Toshkentda avtobus haydovchisi piyodalar o‘tish joyida 18 yoshli piyodani urib yubordi, deb xabar bermoqda poytaxt IIBB matbuot xizmati.
Hodisa 19-sentyabr kuni Yangihayot tumani 2-darajali Choshtepa ko‘chasida sodir bo‘lgan. YUTONG avtobusi haydovchisi yo‘lni kesib o‘tayotgan 18 yoshli qizni urib yuborgan. Avtobus burilish chog‘ida qizni ilib olgan, shundan so‘ng u yiqilib, g‘ildiraklar ostida qolgan. Oqibatda jabrlanuvchiga birinchi tibbiy yordam ko‘rsatishga to‘g‘ri kelgan.
Huquq-tartibot idoralari xodimlari mazkur holat yuzasidan surishtiruv ishlarini boshlab yuborgan. Shuningdek, poytaxt IIBB xodimlari haydovchilarga murojaat qilib, yo‘l harakati qoidalariga rioya qilish, yo‘lni kesib o‘tishda piyodalarga e’tiborliroq bo‘lish, shuningdek, elektron qurilmalardan foydalanmaslikni so‘radi.
Avvalroq Xorazmda yo‘l-transport hodisasi oqibatida ikki yoshli bola vafot etgani haqida xabar berilgandi. Ikki haydovchi to‘qnashib ketib, boshqaruvni yo‘qotgan va piyodalar o‘tish joyida bolani urib yuborgan.
Izohlar