Toshkent viloyatidagi bog‘chalarda yuzdan ortiq bola zaharlanishi oqibatida shifokorlar nazorati ostiga olindi
Viloyatning yana ikki tumanida bolalar xavfsizlik choralari sifatida navbatma-navbat tibbiy ko‘rikdan o‘tkazilmoqda.
Toshkent viloyatining to‘rtta tumanida: Quyi Chirchiq, Oqqo‘rg‘on, Piskent va Bo‘ka tumanlarida bolalar bog‘chalarida ommaviy zaharlanish kuzatildi. Dastlabki ikki nafarining 109 nafari shifokorlar nazoratida, yana ikki nafari ehtiyot chorasi sifatida tibbiy ko‘rikdan o‘tkazilmoqda.
25-sentyabr kuni Maktabgacha va maktab ta’limi vaziri E’zoza Karimova va vazir o‘rinbosari Azizbek Turdiyev Quyi Chirchiq, Oqqo‘rg‘on, Piskent va Bo‘ka tumanlaridagi maktabgacha ta’lim muassasalarida bo‘lib, vaziyatni o‘rgandi.
Hududiy huquqni muhofaza qiluvchi organlar va mas’ullar bilan birgalikda bog‘cha va oshxonalardagi sharoitlar ko‘zdan kechirilib, bog‘cha rahbarlari va tarbiyachilari bilan suhbatlar o‘tkazildi.
Ayni paytda Quyi Chirchiq tumanida 12 nafar, Oqqo‘rg‘on tumanida 97 nafar bola shifokorlar nazoratida bo‘lib, ularning salomatligi barqaror. Piskent va Bo‘ka tumanlaridagi maktabgacha ta’lim muassasalari tarbiyalanuvchilari tegishli tashkilotlar bilan hamkorlikda ehtiyot chorasi sifatida navbatma-navbat tibbiy ko‘rikdan o‘tkazilmoqda. Hozirgi kunga qadar bolalar sog‘lig‘iga jiddiy xavf tug‘diradigan holatlar aniqlanmagan, — deyiladi xabarda.
Holat huquqni muhofaza qiluvchi organlar tomonidan nazoratga olingan, tergov harakatlari boshlangan.
Avvalroq, 24-sentyabr kuni davlat maktabgacha ta’lim muassasalari tarbiyalanuvchilari ovqatdan zaharlanish bilan shifokorlarga murojaat qilgani haqida xabar berilgan edi. Bolalar tana haroratining ko‘tarilishi, ko‘ngil aynishi va diareyadan shikoyat qilishdi. Mutaxassislar tomonidan maktabgacha ta’lim muassasalariga yetkazib berilgan barcha oziq-ovqat mahsulotlari namunalari olindi. Zaharlanish Oqqo‘rg‘on tumanida ishlab chiqarilgan sifatsiz 3,2 foizli kefir tufayli yuzaga kelgan bo‘lishi mumkin.
Mazkur holat yuzasidan 25 sentyabr kuni viloyat IIB huzuridagi tergov bo‘limi tomonidan Jinoyat kodeksining 257-1-moddasi 1-qismi (Sanitariyaga oid qonun hujjatlarini yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan. Dastlabki tergov harakatlari olib borilmoqda. Aybdorlarga 5 yilgacha ozodlikdan mahrum qilish jazosi tayinlanadi. Bolalar ombudsmani vaziyatni kuzatishda davom etadi.
Izohlar