Toshkent viloyatida chiqindi tashish mashinasi yo‘lda butunlay yonib ketdi
Yong‘inga maxsus avtomobil dvigatel bo‘linmasidagi qisqa tutashuv sabab bo‘lgan.
12-may kuni Toshkent viloyatida maxsus “Isuzu” chiqindi tashuvchi avtomashina yo‘lda yonib ketdi, deb xabar berdi viloyat YHXB matbuot xizmati.
Hodisa taxminan soat 09:30 da Yuqori-Chirchiq tumanida D-014 “G‘azalkent – Chirchiq – Yangibozor – Jumobozor – O‘rtasaroy – Nurafshon” avtomobil yo‘lining 46-kilometrida sodir bo‘lgan. Yong‘inga yuk mashinasining dvigatel bo‘linmasidagi qisqa tutashuv sabab bo‘lgan.
Maʼlumotlarga koʻra, avtomobil maxsus maqsadli avtomobil boʻlib, “Toza hudud” davlat korxonasiga tegishli boʻlgan. Avtomobilni 1973-yilda tug‘ilgan haydovchi boshqargan. Qutqaruvchilar yong‘inni o‘chirishgan, hech kim jabrlanmagan. Huquq-tartibot idoralari xodimlari surishtiruv ishlarini boshlagan.
Eslatib oʻtamiz, Sirdaryoda yengil avtomobil yuk mashinasiga borib urilgan va yonib ketgan edi. Avtomobil haydovchisi boshqaruvni yo‘qotgan.
Izohlar