Sovet quvuri, sinovlar, jabrlanganlar: Toshkentdagi issiqlik quvurining yorilishi tafsilotlari ochiqlandi
Voqea joyida shifokorlar, FVV va kommunal xizmat xodimlari ishlamoqda.
10-iyul kuni Toshkent shahri Shayxontohur tumani Farobiy ko‘chasidan o‘tuvchi diametri 800 mm bo‘lgan issiqlik quvurida suv quvuri yorilishi sodir bo‘ldi.
FVV ma’lumotlariga ko‘ra, hodisa kommunal tarmoqdagi issiq suv ta’minoti tarmog‘ini rejali tekshirish paytida sodir bo‘lgan. Issiq suv kuchli bosim ostida bir bo‘lak tuproq va beton plitani yulib oldi, shundan so‘ng favvora yo‘l, do‘konlar, yo‘lovchilar va avtomobillarga quladi.
Yengil tan jarohati olgan 3 nafar fuqaroga shifoxonaga yotqizmasdan birinchi tibbiy yordam ko‘rsatilib, uyiga ruxsat berilgan.
Veolia Energy ma’lumotlariga ko‘ra, shaharda 2025-2026-yillardagi isitish mavsumiga tayyorgarlik ishlari jadvalga muvofiq, 2025-yil 10-iyul kuni soat 10:40 da 16 atmosfera bosimi ostida mexanik mustahkamlik sinovlari o‘tkazilmoqda.
Biroq Farobiy ko‘chasida 1989-yilda yotqizilgan quvur bardosh bera olmadi va 12,6 atmosfera bosimida yorilib ketdi.
Iste’molchilarni issiq suv ta’minotidan uzib qo‘ymasdan, avariya joyi zudlik bilan lokallashtirildi. Oqibatlarni FVV va kommunal xizmat xodimlari bartaraf etmoqda, tez yordam brigadasi navbatchilik qilmoqda.
“Yaqin atrofdagi do‘konlarda moddiy zarar qayd etildi — umumiy maydoni 8 m2 bo‘lgan oynavand vitrinalar sindirilgan, yetkazilgan zarar qoplanadi”, — Veolia Energy.
Izohlar