Qoraqalpog‘istondagi quduqda gaz sizib chiqdi — video
Kutilmagan yuqori gaz bosimi tufayli mutaxassislar quduqni yo‘q qilish ustida ish olib borishmoqda.
27-iyul kuni ijtimoiy tarmoqlarda Qoraqalpog‘istondagi quduqlardan birida nazoratsiz gaz sizib chiqqani haqida ma’lumot tarqaldi. Energetika vazirligi hodisaga izoh berdi.
Ma’lum bo‘lishicha, avariya 26-iyul kuni Mo‘ynoq shahar “Uchsoy” mahallasidagi 1-sonli quduqni burg‘ilash chog‘ida sodir bo‘lgan. Rejalashtirilgan burg‘ilash chuqurligi 5000 metr bo‘lgan 4707 metr chuqurlikdan gaz chiqa boshladi. Ma’lum qilinishicha, bu mazkur hududdagi birinchi qidiruv qudug‘idir.
“Hodisa joyida kutilmaganda gaz bosimi yuqori bo‘lgani sababli quduqni nazorat ostida tugatish ishlari tezkorlik bilan yo‘lga qo‘yildi. Barcha harakatlar xavfsizlik me’yorlariga rioya qilgan holda amalga oshirilmoqda”, — deyiladi xabarda.
Voqea joyida Favqulodda vaziyatlar vazirligi xodimlari, “O‘zbekneftgaz”, “O‘zbekgeofizika” AJ mutaxassislari, shuningdek, ochiq gaz va neft favvoralarini bartaraf etish bo‘yicha harbiylashtirilgan bo‘linmalar ishlamoqda. Atrof-muhit va xodimlarga tahdidning oldini olish uchun chiqindi gazni nazorat ostida yoqish orqali qisman cheklandi.
Hech kim jabrlanmagan. Ma’lum qilinishicha, avariya sodir bo‘lgan joy aholi yashash joylaridan uzoqda joylashgan, gaz esa tarkibi bo‘yicha sof metan bo‘lib, oltingugurtsiz va sog‘liq uchun xavf tug‘dirmaydi. Vazirlik vaziyatning rivojlanishiga qarab qo‘shimcha ma’lumot berishga va’da berdi.
Eslatib o‘tamiz, Qo‘qondagi zavodda ammiak sizib chiqdi: aholi xotirjamlikka chaqirildi. FVVning aniqlik kiritishicha, shifoxonaga 7 kishi murojaat qilgan, shifokorlar ularning ahvolini tekshirib, uylariga javob bergan.
Izohlar