Oliy ta’lim vazirligi soxta hujjatlar asosida talabalarni ommaviy qabul qilish holatlarini tekshirmoqda

Bloger Xushnudbek Xudoyberdiyev xususiy OTMlarning 2-5-kurslariga talabalarni ommaviy qabul qilishning korrupsion sxemasi haqida ma’lumot berdi. Holat yuzasidan Oliy ta’lim vazirligi munosabat bildirdi.

Ma’lumotlarga ko‘ra, u mijoz qiyofasida to‘lov evaziga yuqori kurslarga “o‘tkazish”ni reklama qilayotgan firmalardan biriga murojaat qilgan va bu sxema qanday ishlashini aniqlagan. Konsalting firmalari 10-30 mln so‘m evaziga xususiy universitetlarning yuqori kurslariga qabul qilishni va’da qilmoqda.

Mijozga 50 dan ortiq yo‘nalishlar ro‘yxatidan mutaxassislikni va kamida 10 ta xususiy ta’lim muassasalari ro‘yxatidan oliy ta’lim muassasasini tanlash taklif etiladi. Shundan so‘ng, talaba go‘yoki ilgari MDH davlatlaridan biri: Rossiya, Qozog‘iston, Qirg‘iziston yoki Tojikistondagi oliy o‘quv yurtida tahsil olgani haqida soxta ma’lumotnoma rasmiylashtiriladi.

Hujjat mijozga ko‘rsatilmaydi, lekin aynan u O‘zbekistondagi xususiy universitetga soxta “perevod” uchun ishlatiladi. Shartnoma imzolangandan va o‘qish to‘lovi to‘langandan so‘ng talaba rasmiy ravishda kerakli kursda, shu jumladan HEMIS davlat tizimida ro‘yxatdan o‘tadi.

Blogerning fikricha, bu jarayonda universitetlarning o‘zi ham ishtirok etishi mumkin, chunki ularning roziligisiz soxta hujjat tekshiruvdan o‘ta olmaydi. Talabalar nafaqat OTMga qabul qilinadi, balki HEMIS (OTMlarda talabalarni hisobga olishning elektron tizimi) tizimida ham rasmiylashtiriladi, biroq faqat kontrakt to‘liq to‘langandan so‘ng.

Blogerning aniqlashicha, 2025-yil 1-yanvardan 3-iyulgacha HEMIS tizimiga 41 812 nafar talaba qo‘shilgan, ulardan 25 821 nafari sirtqi ta’lim shakliga o‘tgan. Xususiy OTMlardan biri 3-4 kurslarga birdaniga 3 200 kishini, ikkinchisi yuqori kurslarga 1 500 dan ortiq kishini qabul qilgan.

Oliy ta’lim, fan va innovatsiyalar vazirligi talabalarni soxta hujjatlar asosida o‘qishga qabul qilish haqidagi xabarlar jamoatchilik muhokamasiga sabab bo‘lganini tasdiqladi. Qayd etilishicha, har bir talaba HEMIS tizimida ro‘yxatdan o‘tadi, unda yo‘nalish, kurs va ta’lim shakli qayd etiladi.

Xorijiy OTMdan o‘qishni ko‘chirishda faqat rasmiy hujjatlar to‘plami, o‘quv rejalarini solishtirish va rektor buyrug‘iga ruxsat beriladi va barcha ma’lumotlar elektron tizimda tekshiriladi. Vazirlik ushbu masala bo‘yicha tekshiruv boshlanganini ma’lum qildi. Huquqbuzarliklar aniqlangan taqdirda, ularga huquqiy baho berilib, belgilangan tartibda jamoatchilikka yetkaziladi.

Avvalroq Oliy ta’lim vaziri talabalarni pora evaziga o‘qishga qabul qilmaslikni so‘ragandi. Qo‘ng‘irotboy Sharipov Oliy ta’lim vazirligi korrupsiyaga qarshi murosasiz kurashish tarafdori ekanini ta’kidladi.