“O‘zsuvta’minot” suv ta’minoti masalasida “Yuksalish” natijalariga qo‘shilmadi
Harakat amaldorlarni tez-tez joylarga chiqib, ishlar qanday ketayotganini shaxsan tekshirishga chaqirdi.
“O‘zsuvta’minot” “Yuksalish” umummilliy harakatining O‘zbekistonda qurilayotgan suv ta’minoti va kanalizatsiya inshootlarining ahvoli yomonligi haqidagi bayonotini rad etdi.
Kompaniya ayblovlarni tan olmadi va “Yuksalish” rasmiy xizmatlardan emas, balki tashqi manbalardan olingan ma’lumotlardan foydalanganini ta’kidladi. Shuningdek, “O‘zsuvta’minot” ma’lumotlariga ko‘ra, tahlil paytida harakat loyiha hujjatlarini hisobga olmagan va ro‘yxatga hali ham qurilish ishlari davom etayotgan obyektlar kiritilgan.
“O‘rganishlar ishchi guruhi tarkibida soha faoliyati haqida to‘liq maʼlumotga va dalillarga ega bo‘lmagan xodimlarning shunchaki xulosalari asosida tayyorlanganini ko‘rsatadi”, — deyiladi xabarda.
O‘z navbatida, “Yuksalish” harakati barcha ma’lumotlar rasmiy manbalardan, jumladan, “O‘zsuvta’minot”dan olinganini ma’lum qildi. Farqi shundaki, hisobotda aholining shikoyatlari inobatga olingan. Ba’zi joylarda obyektlar allaqachon nazoratga olingan, ba’zi hududlarga suv kela boshlagan, boshqa joylarda esa bunga faqat va’da berilgan.
“Yuksalish” harakati raisi Bobur Bekmurodov mas’ullarni tez-tez joylarga chiqib, ishlarning borishini shaxsan tekshirishga chaqirdi.
“Bugun O‘zbekistonda fuqarolik jamiyati va jamoatchilik nazorati mavjud va biz prezident tomonidan belgilangan vazifalar ijrosini kuzatishda davom etamiz”, — dedi u.
Avvalroq “Yuksalish” harakati aholini suv va kanalizatsiya bilan ta’minlashda qonunbuzarlik holatlarini aniqlagani haqida xabar berilgandi. Haqiqiy vaziyat rasmiy hisobotlardan farq qiladi va mas’ul idoralar vaziyatni nazorat qilmayapti.
Izohlar