O‘zbekistonliklar Rossiya va Qozog‘istondan kelayotgan sintetik giyohvand moddalarga ruju qo‘ymoqda

26-iyun — Xalqaro giyohvandlikka qarshi kurash kuni munosabati bilan DXX xodimlari 2 tonna 135 kg giyohvandlik moddasini yoqib yubordi, deb xabar qilmoqda idora axborot xizmati.

Musodara qilingan moddalar orasida:

• 99 kg 882 gr geroin;
• 202 kg 555 gr afyun;
• 415 kg 124 gr gashish;
• 395 kg 739 gr marixuana;
• 613 kg 94 gr kannabis;
• 153 kg 15 gr ko‘knori poxoli;
• 57 kg 847 gr mefedron;
• 29 kg 603 gr A-PVP;
• 5 kg 750 gr spays;
• 5 kg 544 g katinon va boshqalar mavjud.

DXX ma’lumotlariga ko‘ra, mamlakatda sintetik giyohvand moddalarning aylanmasi va iste’moli oshgan. Bular asosan Rossiya va Qozog‘istondan O‘zbekistonga kirib kelayotgan Mefedron, Alfa-PVP, MDMA preparatlaridir. 2024-2025 yillarda 8 ta narkologiya laboratoriyasi aniqlandi, ularning tashkilotchilariga nisbatan jinoyat ishlari qo‘zg‘atilib, tegishli choralar ko‘rildi.

Huquqni muhofaza qiluvchi organlar xodimlari, shuningdek, internet-giyohvandlik guruhlari tashkilotchilarining xorijda yollangan kuryerlarni O‘zbekistonga yuborib, ularni giyohvandlik jinoyatlariga jalb qilish holatlarini aniqladilar. 2024-yilda xorijdagi internet-giyohvandlik guruhlarining 6 nafar a’zosi qo‘lga olindi, Qirg‘iziston va Qozog‘iston orqali O‘zbekistonga Pregabalin dori vositasini olib kirib tarqatish holatlari ham fosh etildi.

Shuningdek, Afg‘oniston, Tojikiston va Eronda istiqomat qiluvchi giyohvand moddalar savdogarlari O‘zbekistonning xalqaro chegara nazorat punktlari orqali Rossiya va Qozog‘istonga katta miqdordagi giyohvand moddalarni turli xil tovarlar orasiga yashirib o‘tkazishga urinish holatlari ham ko‘paydi. Bu borada 141 kg dan ortiq giyohvandlik vositalari musodara qilindi.

Eslatib o‘tamiz, Farg‘onada odamga giyohvand modda tashlashni buyurgan prokuror jarimaga tortilgandi. Niqobli qurollangan huquq-tartibot idoralari xodimlari bostirib kirgan mahalliy klub egasi ta’qib ostiga olingan.