O‘zbekistonlik ayol aldov yo‘li bilan Hindistonga olib kelinib, fohishalikka majburlandi

O‘zbekiston elchixonasi Hindistonga odam savdosi uchun ketaman deb aldanib qolgan vatandoshimizga vataniga qaytishiga yordam berdi, deb xabar bermoqda “Dunyo”.

Diplomatik vakolatxonaning konsullik boʻlimiga Hindiston huquq-tartibot organlaridan Dehli shahridagi Indira Gandi nomidagi xalqaro aeroportda Oʻzbekiston fuqarosi ogʻir psixologik holatda ekanligi haqida maʼlumot kelib tushdi. Diplomatlar zudlik bilan jabrlanuvchi bilan bog‘lanib, uni elchixona binosiga olib ketishdi.

Tekshiruv davomida ayolga ikki kishidan Dehlidagi restoranlardan birida ofitsiant bo‘lib ishlash taklifi tushgani ma’lum bo‘ldi. Biroq Hindistonga yetib kelib, mehmonxonada ro‘yxatdan o‘tganidan so‘ng, ayol tuzoqqa tushib qolganini tushunib, vataniga qaytarishni talab qiladi.

Ikki fuqaro qizdan xarajatlarini qoplashni talab qilib, uni intim xizmat ko‘rsatishga majburlamoqchi bo‘lgan. Jabrlanuvchi qochishga muvaffaq bo‘lgan va yordam so‘rab mahalliy politsiyaga murojaat qilgan. Homiy tashkilotlar ko‘magida elchixona Toshkentga aviachipta sotib oldi.

Ayni paytda Oʻzbekiston fuqarosini ekspluatatsiya qilishga urinishda gumon qilingan shaxslarga nisbatan qonuniy choralar koʻrish boʻyicha Hindistonning vakolatli organlari bilan hamkorlik qilinmoqda.

Diplomatik missiya vatandoshlarni Hindistonga borishdan oldin turli shubhali guruhlar yoki shaxslarning yolg‘on va’dalariga berilmaslikka, ushbu mamlakatga kirish va bo‘lish chog‘ida mahalliy qonunchilik talablariga qat’iy rioya qilishga chaqiradi, deyiladi bayonotda.

Elchixona vatandoshlarga, agar kerak boʻlsa, zudlik bilan quyidagi kontaktlar orqali zarur konsullik va yuridik yordam olishlarini tavsiya qiladi: +91 11 2467 0774/75 yoki Telegram bot: @consuluzbindia_bot.

Eslatib o‘tamiz, Turkiyada o‘zbekistonlik ikki qiz fohishalikka majburlangandi. Jabrlanuvchilarni aldab, mamlakatga olib kirishgan, pasportlarini olib qo‘yishgan, kaltaklashgan va qotillik bilan qo‘rqitishgan.