O‘zbekistonda SES xodimlari yuz tonna sifatsiz mahsulotni musodara qildi
Mutaxassislar 300 ta dehqon bozorida reydlar o‘tkazib, 500 dan ortiq oziq-ovqat mahsulotlarini jarimaga tortdi.
O‘zbekistonda SES xodimlari tomonidan dehqon bozorlarida reydlar o‘tkazilib, sog‘liq uchun xavfli deb topilgan 130 tonnadan ortiq oziq-ovqat va tayyor taomlar musodara qilindi, deb xabar beradi idora matbuot xizmati.
Ma’lumotlarga ko‘ra, o‘tkazilgan reydlar davomida qo‘mita xodimlari tomonidan savdo chodirlaridan tashqarida, maxsus kiyimsiz va tibbiy ko‘rikdan o‘tmasdan, shuningdek, sanitariya qoidalarini buzgan holda mahsulot savdosi bilan shug‘ullangan 500 dan ortiq go‘sht, sut, qandolat, salat va non mahsulotlari sotuvchilariga jarimalar qo‘llanilgan.
Natijada 300 ta dehqon bozorida mutaxassislar tomonidan 130 tonnadan ortiq sog‘liq uchun xavfli deb topilgan mahsulotlar musodara qilindi. Bundan tashqari, SES xodimlari bozorlarning sanitariya infratuzilmasida bir qator muammolarni, jumladan, go‘sht, shuningdek, sut va sut mahsulotlarini sotish uchun maxsus jihozlangan pavilonlarning yo‘qligini aniqladilar.
Ko‘plab bozorlarda mutaxassislar veterinariya-sanitariya laboratoriyalari, jamoat hojatxonalari va chiqindilarni vaqtincha yig‘ish uchun maxsus joylarni topmagan. Ba’zi joylarda suv ta’minoti, shuningdek, oqova suvlarni yig‘ish va zararsizlantirish tizimlari ham yo‘q edi.
Shuningdek, ko‘plab joylarda dezinfeksiya, dezinseksiya va deratizatsiya bilan shug‘ullanadigan tashkilotlar bilan shartnomalar yo‘qligi aniqlangan. Qayd etilishicha, qo‘mita tomonidan bozorlarning sanitariya holatini me’yorga keltirish, ovqatdan zaharlanish holatlarining oldini olish, shuningdek, aholini kafolatlangan xavfsiz oziq-ovqat mahsulotlari bilan ta’minlash maqsadida nazorat reydlari muntazam ravishda o‘tkazib kelinmoqda.
Avvalroq Toshkentda muddati o‘tgan ichimliklar ombori yopilgani haqida xabar berilgan edi. Mahsulotlar yo‘q qilindi va obyekt ustidan nazorat o‘rnatildi.
Izohlar