O‘zbekistonda ingliz tili o‘qituvchilari testlar noto‘g‘ri tuzilganidan shikoyat qildi

O‘zbekistonda bir guruh ingliz tili o‘qituvchilari attestatsiya testlari noto‘g‘ri tuzilganidan shikoyat qildi. MMTV hodisaga izoh berdi.

24, 30 va 31-oktyabr kunlari butun mamlakat bo‘ylab ingliz tili o‘qituvchilari uchun attestatsiya imtihonlari bo‘lib o‘tdi. Biroq, test o‘tkazish jarayonida o‘qituvchilar savollarda jiddiy muammolarni topdilar. Bir guruh o‘qituvchilar MMTV rahbari E’zoza Karimovaga murojaat yo‘llab, u yerda aniqlangan xatolar haqida gapirib berishdi va qayta test o‘tkazishni talab qilishdi.

Imtihon savollarida quyidagi xatolar topildi:

• test savollari haddan tashqari murakkab bo‘lib chiqdi va ko‘p hollarda o‘qituvchining kundalik pedagogik amaliyotida va o‘quvchilar bilan ishlashda zarur bo‘lgan bilim va ko‘nikmalariga mos kelmadi:
• ayrim masalalarda mantiqiy va lingvistik xatolarga yo‘l qo‘yilgan, bu esa yakuniy natijalarning ishonchliligini shubha ostiga qo‘yadi;
• test materiallari validlik va ishonchlilik talablariga javob bermaydi, chunki o‘qituvchining haqiqiy kasbiy kompetensiyalari emas, balki faqat akademik bilimlarning tor doirasi tekshirilgan;
• bir qator hollarda testologlar savollarni ataylab murakkablashtirdilar, bu esa pedagoglarda stress va adolatsizlik hissini uyg‘otdi.

Natijada ko‘plab o‘qituvchilar kerakli ballni to‘play olmadilar. O‘tkazilgan so‘rovlarga ko‘ra, ba’zi guruhlarda attestatsiyadan o‘ta olmaganlar foizi 90 foizdan oshadi. Vaholanki, xuddi shu o‘qituvchilar bahorda juda yuqori natijalarni ko‘rsatishgan.

Shu munosabat bilan pedagoglar quyidagilarni so‘rashdi:

• 2025-yil 24, 30 va 31-oktyabr kunlari o‘tkazilgan ingliz tili bo‘yicha attestatsiya natijalarini qayta ko‘rib chiqsin, ularni haqiqiy emas deb hisoblasin va takroriy test sinovlarini tashkil etsin;
• test savollari va javoblarini rasmiy ekspertizadan o‘tkazish;
• bundan buyon bunday holatlar takrorlanmasligi uchun mas’ul testologlar va mansabdor shaxslarning faoliyatini qayta ko‘rib chiqish;
• attestatsiya tizimini pedagoglarga o‘zlarining haqiqiy kasbiy qobiliyatlarini namoyon etish imkonini beradigan shaffof va adolatli mexanizmga aylantirish.

MMTV murojaatga javob qaytarib, attestatsiya natijalaridan norozi bo‘lgan pedagoglar test jarayonida platforma orqali muayyan test topshiriqlari bo‘yicha o‘z e’tirozlarini qoldirishlari mumkinligini ma’lum qildi. Shuningdek, natijalar e’lon qilingan kundan boshlab 10 kun ichida platformadagi shaxsiy kabinet orqali yoki yozma ravishda apellyatsiya yuborish mumkin.

Vazirlik har bir test topshirig‘i va bildirilgan e’tirozlar yuzasidan asoslantirilgan tushuntirish berishga tayyor. Buning uchun (71) 207-79-79 telefon raqami ham ishlab turibdi. Afsuski, jarayondan shaxsiy maqsadlarda foydalanishga urinish holatlari uchrab turibdi. Yetarli ball to‘play olmagan pedagoglardan mablag‘ yig‘ishga chaqiriqlar, asossiz shartlarda attestatsiyadan o‘tish takliflari, shuningdek, ijtimoiy tarmoqlarda ayrim test savollarini buzib tarqatish holatlari kuzatilmoqda. Ushbu masalalar bo‘yicha tekshiruv boshlandi, — deyiladi xabarda.

Vazirlik, shuningdek, pedagoglarning sudga murojaat qilish huquqi borligini eslatdi. Bundan tashqari, MMTV OAV bilan hamkorlik qilishga va savollarga ochiq javob berishga tayyorligini ma’lum qildi. Yaqin kunlarda matbuot anjumani tashkil etish rejalashtirilgan.

Avvalroq chet tili o‘qituvchilari sertifikatlari yo‘qligi uchun ishdan bo‘shatilishi bilan qo‘rqitilgani haqida xabar berilgan edi. MMTV vaziyatga oydinlik kiritdi.