O‘zbekistonda “Dok-1 Maks” siropidan jabrlangan yana bir bola vafot etdi

Jizzax viloyatida Hindistonning Marion Biotech kompaniyasi tomonidan ishlab chiqarilgan “Dok-1 Maks” preparatini qabul qilib, nogiron bo‘lib qolgan yana bir bola vafot etdi, deya xabar bermoqda “Gazeta.uz” bolaning yaqinlariga tayanib.

Ma’lumotlarga ko‘ra, 3-iyul kuni Muslima Ziyoboyeva 8 yoshida vafot etgan. 2022-yil dekabr oyida shifokor ko‘rsatmasidan so‘ng qizga kuniga uch mahal “Dok-1 Maks” siropi berila boshlangan, shundan so‘ng bolaning buyragi ishdan chiqqan va siydik chiqarish funksiyasi buzilgan. Qizcha dastlab mahalliy shifoxonaga yotqizilgan, so‘ngra Toshkentdagi Bolalar milliy tibbiyot markaziga o‘tkazilgan.

Poytaxtga safari chog‘ida jabrlanuvchi komaga tushib, bir haftadan keyingina o‘ziga kelgan. Davolanishiga qaramay, bola I guruh nogironligini olgan. 2024-yil noyabr oyida bo‘lib o‘tgan sudda qizning ota-onasi u o‘rnidan tura olmasligini, yura olmasligini va gapira olmasligini, parvarishlash va davolanish xarajatlari esa oyiga 10 million so‘mdan oshishini aytishgan. O‘shanda umumiy summa 1 mlrd so‘mni tashkil etgan.

Eslatib o‘tamiz, Muslim Ziyoboyeva “Dok-1 Maks” shamollashga qarshi siroplarini iste’mol qilib, nogiron bo‘lib qolgan o‘nlab bolalardan biriga aylandi. 2022-yil dekabr oyida O‘zbekistonda ushbu siropdan foydalanish oqibatida 68 nafar bola vafot etgan, 16 nafar bola xavfli tan jarohati olgan, yana ikki nafari yengil tan jarohati olgan, 23 nafar bola nogiron bo‘lib qolgan. Keyinchalik mutaxassislar sirop nima uchun bolalarni o‘ldirganini aniqladi. Ishlarning asosiy ishtirokchilariga 20 yildan 16 yilgacha qamoq jazosi berildi.

Sud “Dok-1 Maks” qurbonlarining ota-onalari va vasiylariga tovon puli to‘lashga qaror qildi. Biroq 2024 yil oktyabr oyida “Dok-1 Maks” dorisidan zaharlanib, 65 kun komada yotgan besh yoshli bolaning otasi Feruz Nuritdinov sog‘liqni saqlash vaziri vazifasini bajaruvchi Asilbek Xudayarov doridan jabrlanganlarga kafolatli yordam ko‘rsatilishi haqida jamoatchilikka yolg‘on ma’lumot berganini ma’lum qilgandi. Ekologiya vaziri maslahatchisi Rasul Kusherbayev bunga jamoatchilik e’tiborini qaratib, jabrlanganlarning oilalariga tovon puli haligacha to‘liq to‘lanmaganini aytdi. Shuningdek, davlat xizmatchisining ta’kidlashicha, kechikish jabrlangan bolalarni davolashni davom ettirishga tahdid soladi, bu ularning ko‘pchiligi uchun hayotiy zaruratdir.