O‘zbekistonda bolalar o‘rtasida O‘RVI bilan kasallanishning ko‘payishi xavotir uyg‘otmoqda

Ijtimoiy tarmoqlarda bolalar orasida mavsumiy O‘RVIga o‘xshash alomatlar bilan kechuvchi, biroq diareya va qusish bilan kechadigan infeksiya tarqalayotgani haqida xabarlar tarqaldi. Sog‘liqni saqlash vazirligi holatga izoh berdi.

Vazirlik ma’lumotlariga ko‘ra, 2025-yilda viruslar mavsumi biroz kechroq — oktyabr oyining so‘nggi 10 kunida boshlangan, bu me’yor doirasida. Simptomlar yo‘tal, aksirish, burun oqishi, tana haroratining ko‘tarilishi, ba’zi bemorlarda esa oshqozon-ichak traktining buzilishi bilan namoyon bo‘ladi. Kasalliklar har doim ham bir xil kechmaydi va bu hodisa virusning turli shtammlari bilan bog‘liq.

Bir vaqtning o‘zida bakterial va virusli infeksiyalarning avj olishi kuzatilmaydi.

Mikrob olamida shunday jarayon mavjudki, bunda bir mikroorganizm ikkinchisining ko‘payishiga yo‘l qo‘ymaydi. Mavsumiy respirator kasalliklar ko‘payishini koronavirus mutatsiyasi deb baholash mutlaqo noto‘g‘ri. Qolaversa, bugungi kunda COVID-19 oddiy respirator infeksiyaga aylangan. Ayni paytda mamlakatda koronavirus bilan bog‘liq vaziyat barqaror, — deyiladi xabarda.

Ma’lum qilinishicha, tibbiyot muassasalarida O‘RVIni davolash uchun joylar va dori-darmon zaxiralari yaratilgan. Mamlakatdagi epidemiologik vaziyat kuzatib borilmoqda. Sog‘liqni saqlash vazirligida alohida shtab tashkil etilib, unga Sanitariya-epidemiologiya qo‘mitasi mutaxassislari, soha olimlari, tizim mas’ullari, shuningdek, Qoraqalpog‘iston, Toshkent shahri va viloyatlardan onalar va bolalar muhofazasiga mas’ul mutaxassislar kiritildi.

Ota-onalarga kasallik alomatlari kuzatilgan bolalar bilan o‘z vaqtida oilaviy shifokorlarga murojaat qilish tavsiya etiladi. Umuman olganda, O‘zbekistonda epidemiologik vaziyat barqaror. Shuning uchun xavotirga o‘rin yo‘q, — deyiladi vazirlik xabarida.

Mavzuga doir: Kuzda bolalar salomatligini qanday saqlash mumkin — SSV tavsiyalari Ota-onalarga uyqu va dam olish rejimi ham eslatib o‘tildi.