Navoiyda zavod ishchilari ikki mlrd so‘mlik oltinni o‘g‘irlamoqchi bo‘ldi
Jinoyatchilar tarkibida qimmatbaho metall ko‘p bo‘lgan yarim tayyor mahsulotni korxona hududidan olib chiqib ketolmagan.
Navoiy kon-metallurgiya kombinatida huquq-tartibot idoralari xodimlari tomonidan oltin o‘g‘irlashga urinishning oldi olindi, deb xabar bermoqda DXX matbuot xizmati.
NKMK Shimoliy kon boshqarmasi tarkibidagi 3-gidrometallurgiya zavodining ikki nafar smena ustasi va bir nafar apparatchisi umumiy og‘irligi 2 kg bo‘lgan tarkibida oltin miqdori yuqori bo‘lgan yarim tayyor mahsulotni ventilyatsiyaga yashirdi.
Ekspertlar aniqlashicha, olib qo‘yilgan modda tarkibida 1 kg 523 gr sof oltin mavjud bo‘lib, uning qiymati 2,1 mlrd so‘mni tashkil etadi. Mazkur holat yuzasidan Jinoyat kodeksining 25, 169-moddasi 4-qismi «a» bandi bilan jinoyat ishi qo‘zg‘atilib, tergov harakatlari o‘tkazilmoqda. Tergov olib borilmoqda.
Avvalroq Navoiyda bir erkak tarmoqdan olingan ko‘rsatma asosida bomba yasab, oltin konini portlatmoqchi bo‘lgani haqida xabar berilgandi. U o‘zining boyish rejasini amalga oshira olmagan.
Izohlar