Namanganda bolalar uchun noqonuniy diniy maktablar fosh etildi
Barcha “o‘qituvchilar” va ota-onalar javobgarlikka tortildi.
Namangan viloyatida huquq-tartibot idoralari xodimlari bolalar uchun mo‘ljallangan noqonuniy diniy maktablarni fosh qildi, deb xabar berdi matbuot xizmati.
Idora ma’lumotlariga ko‘ra, reydlar davomida quyidagi fuqarolar qo‘lga olingan:
- 30 yoshli namanganlik — ko‘p qavatli uylardan birida 15 kishiga diniy saboq bergan;
- “Ma’rifat” mahallasida yashovchi 51 yoshli ayol — uyida 14 nafar voyaga yetmaganlarga diniy ta’lim berib, har biridan 1,5 mln so‘mdan oylik olgan;
- Yangi Namangan tumani “Mehnatobod” mahallasida yashovchi 42 yoshli fuqaro — 10 nafar voyaga yetmagan qiz va 3 nafar fuqaroga diniy ta’lim bergan;
- Uychi tumani “Mashad” mahallasida yashovchi 48 yoshli fuqaro voyaga yetmagan bolalarni o‘z uyida o‘qitgan.
“Barcha “diniy murabbiylar”, shuningdek, bolalarni tarbiyalash bo‘yicha o‘z majburiyatlarini bajarmagan ota-onalar amaldagi qonunchilikka muvofiq javobgarlikka tortildi”, — deyiladi xabarda.
Avvalroq O‘zbekistonda voyaga yetmaganlarga dinni o‘rgatganlik uchun jinoiy javobgarlik paydo bo‘lishi haqida xabar berilgandi. Qoidabuzarni katta miqdordagi jarimadan uch yilgacha ozodlikdan mahrum qilishgacha bo‘lgan jazo kutmoqda.
Izohlar