2025-yil 11-oktyabr kuni Farg‘ona viloyatida haydovchilik guvohnomasiga ega bo‘lmagan haydovchi tanishining Onix avtomobili ruliga o‘tirib, ikki bolali ayolni urib yubordi, deb xabar bermoqda Kun.
YTH Farg‘ona shahridagi ko‘chalardan birida sodir bo‘lgan. Xadichabonu Habibullayeva piyodalar o‘tish joyidan sun’iy notekislik bilan o‘tayotgan 31 yoshli Dilafruz Sayfullayeva, uning 3 yoshli o‘g‘li Yasinboy Abdurahmonov va ikki yoshli jiyani Xadiya Qodirovani urib yubordi.
Zarba shu qadar kuchli bo‘lganki, ayol va bolalar bir necha metrga uloqtirilgan. Oqibatda Dilafruz Sayfullayeva og‘ir tan jarohati olib, hanuzgacha to‘shakda yotibdi. Shifoxonada davolanganiga qaramay, uning o‘g‘li va jiyanida baxtsiz hodisa asoratlari saqlanib qolgan.
Hodisa yuzasidan tergov ishlari olib borildi. Xadichabonu Habibullayevaga nisbatan “munosib xulq-atvorda bo‘lish haqida tilxat” ehtiyot chorasi qo‘llanilib, ish sudga oshirilgan.
To‘qnashuv paytida qizim va ikki nabiram turli tomonga sochilib ketdi. Qizning haydovchilik guvohnomasi yo‘q edi. U ruxsatsiz tanishining mashinasini tortib oldi. Shifoxonada davolanayotganiga qaramay, qizim haligacha to‘shakka mixlanib yotibdi, o‘zi bir piyola choy ham icha olmaydi. Nabiralarda avariya asoratlari, miya chayqalishi qoldi. Kechalari bezovta bo‘ladilar, uxlay olmaydilar, uyquda siyishni boshlaydilar, ilgari bunday bo‘lmagan. Eng achinarlisi, qizim va nabiralarimning bu ahvolga tushishiga sababchi bo‘lgan ayol yordam berish o‘rniga konsert va to‘ylarda bemalol ko‘ngilxushlik qilyapti. Sud hukmidan norozimiz, jazo juda yengil, — deydi Dilafruz Sayfullayevaning onasi Guljamol Qodirova.
Sudda Xadichabonu Habibullayeva jabrlanuvchilarning davolanishi uchun tanishi, avtomobil egasi tomonidan 20 mln so‘mdan ortiq, shaxsan o‘zi 18,7 mln so‘m sarflangani, shuningdek, qo‘shimcha 20 mln so‘m o‘tkazmoqchi bo‘lganini ma’lum qildi. Ammo uning so‘zlariga ko‘ra, Dilafruz Sayfullayeva va uning qonuniy vakili 100 mln so‘m talab qilgan.
Jabrlanuvchi Dilafruz Sayfullayevaning aytishicha, sudlanuvchi shifoxonadan chiqqach, uning ahvoli bilan qiziqmay qo‘ygan. Shuningdek, u uzoq muddatli davolanish zarurati tufayli Xadichabonu Habibullayevadan 100 million so‘m so‘raganini, biroq u bu summani to‘lashdan bosh tortganini, shu sababli jabrlanuvchi suddan qonuniy chora ko‘rishni so‘raganini tushuntirdi.
Turmush o‘rtog‘im ikkinchi guruh nogironi, men pensionerman. Bor mablag‘imiz qizimning sog‘lig‘ini tiklashga ketyapti. Zarurat yuzasidan o‘sha ayolga qo‘ng‘iroq qilib, dori-darmon masalasida yordam so‘rasam, vaqti yo‘qligini aytib, go‘shakni qo‘yadi, — Guljamol Qodirova.
Xadichabonu Habibullayeva Jinoyat kodeksining 266-moddasi 1-qismi (Transport vositalari harakati yoki ulardan foydalanish xavfsizligi qoidalarini buzish) bilan aybdor deb topildi. Unga 2 yil muddatga ozodlikni cheklash jazosi tayinlandi. Bundan tashqari, sud Xabibullayevadan jabrlanuvchilar foydasiga moddiy zarar hisobidan 280 ming so‘m undirish to‘g‘risida qaror chiqardi.
Habibullayevaning so‘zlariga ko‘ra, u jabrlanuvchilarga qariyb 70 million so‘m sarflagan. Jabrlanuvchi va uning qonuniy vakili yuqori instansiya sudiga apellyatsiya shikoyati berdi. Dilafruz Sayfullayeva sud juda yengil jazo tayinlagan deb hisoblaydi, shuningdek, yetkazilgan zarar to‘liq qoplanmaganini ta’kidlaydi.
Mavzuga doir: Mast holda odamni urib yuborgan, jasadni xotini bilan birga yashirgan: IIB xodimi ishtirokidagi YTH tafsilotlari ma’lum bo‘ldi. Marhumning jasadi suv kanaliga tashlangan, u haligacha topilmagan, qidiruv ishlari olib borilmoqda.
