DXX Namanganda terrorchilik tashkilotining 21 nafar a’zosidan iborat hujayrani fosh etdi
Tashkilotga yosh qiz rahbarlik qilgan va u o‘z faoliyatiga qarindoshlarini jalb qilgan.
Namangan viloyatida huquq-tartibot idoralari xodimlari yosh qiz boshchiligidagi terrorchilik tashkilotining 21 nafar tarafdorini qo‘lga oldi, deb xabar bermoqda DXX matbuot xizmati.
Ma’lumotlarga ko‘ra, Pop tumanida yashovchi ayol ijtimoiy tarmoqlarda sahifalar ochib, u yerga “Islom davlati” terrorchilik tashkiloti haqida ma’lumot joylashtirgan. Qiz Janubiy Koreyada ishlayotgan o‘zbekistonlik bilan ota-onasining roziligisiz shar’iy nikohdan o‘tgan va turmush o‘rtog‘i bilan jangovar harakatlar hududiga ketishni rejalashtirgan.
Shuningdek, u uzoq qarindoshi va qo‘shnilarini ham o‘z faoliyatiga jalb qilgan. Shuningdek, ular ijtimoiy tarmoqlarda yopiq kanallar tashkil etish bilan shug‘ullanib, ularga o‘z qarindoshlari, qo‘shnilari va ekstremizmga moyil shaxslarni ham qo‘shishgan. Olib borilgan tezkor tadbirlar davomida ulardan diniy kitoblar, axborot tashuvchi vositalar va boshqa ashyoviy dalillar tegishli tartibda rasmiylashtirib olingan.
Bundan tashqari, huquq-tartibot idoralari xodimlari qo‘lga olingan 4 nafar shaxsga nisbatan Jinoyat kodeksining 244-1-moddasi (Jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) va 244-2-moddasi (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atdi. Ulardan ikki nafari tartib posbonlari tomonidan qamoqqa olingan, yana 17 nafar yacheykaning qolgan a’zolariga nisbatan tergovga qadar tekshiruv harakatlari olib borilmoqda.
Avvalroq Qo‘qonda Suriyadagi terrorchilar safiga qo‘shilishni rejalashtirgan erkak qo‘lga olingani haqida xabar berilgandi. Jinoyatchi ijtimoiy tarmoqlarda guruh tuzib, boshqa fuqarolarni ham “hijrat” qilishga chaqirgan.
Izohlar