Buxoroda hokim yordamchisi yerni rasmiylashtirish uchun 6 ming dollar pora talab qildi

Buxoro viloyatida 7 sotix yer maydonini rasmiylashtirib berish evaziga 6 ming dollar va’da qilgan yordamchi ushlandi, deb xabar bermoqda DXX matbuot xizmati.

Voqea 10-sentyabr kuni Peshku tumanida sodir bo‘lgan. Mahalliy fuqaro huquq-tartibot idoralariga tovlamachilik haqida ariza bilan murojaat qilib, hokim yordamchisi o‘z xizmat mavqeidan foydalanib, undan davlat jamg‘armasidan yer uchastkasini rasmiylashtirish uchun pul talab qilganini aytdi.

Amaldor tadbirkor auksionda sotib olishi uchun K-Savdo avtomatlashtirilgan tizimi orqali 7 sotixni rasmiylashtirib berish evaziga 6 ming dollar talab qilgan. Tartib posbonlari erkakni vositachidan pul olayotgan vaqtida qo‘lga olgan.

Huquq-tartibot idoralari xodimlari tomonidan unga nisbatan Jinoyat kodeksining 210-moddasi 2-qismi “v” bandi (Tovlamachilik yo‘li bilan pora olish) bilan jinoyat ishi qo‘zg‘atilib, qamoqqa olingan. Tergov harakatlari davom etmoqda.

Avvalroq Andijon viloyatida pora bilan bog‘liq ish bo‘yicha hokimning ikki o‘rinbosari qo‘lga olingani haqida xabar berilgandi. Mutasaddilar fermer xo‘jaligining eksport rejasini “yopish” uchun tadbirkordan 65 million so‘m talab qilgan.