Andijonlik pensioner do‘stlari bilan qarta va oshiq o‘ynagani uchun yetti yilga qamalishi mumkin
Huquq-tartibot idoralari xodimlari qimorxona aniqlangani haqida xabar berdi.
Andijon viloyatida ichki ishlar organlari xodimlari mahalliy fuqaro o‘z uyida tashkil etgan yashirin kazinoni fosh qildi, deb xabar bermoqda IIV matbuot xizmati.
Ma’lumotlarga ko‘ra, voqea Andijon tumanida sodir bo‘lgan. 67 yoshli mahalliy fuqaro o‘z uyida yashirin qimor o‘yinlarini uyushtirgan. Huquq-tartibot idoralari xodimlari buni navbatdagi reyd davomida aniqladi.
Tartib posbonlari tezkor tadbir doirasida voqea joyida tintuv o‘tkazib, o‘yinlar uyushtirayotgan xonadon egasidan 4 mln 535 ming so‘m, yana 300 dollar hamda 550 ming so‘m pullarni topishgan. Huquq-tartibot idoralari erkakka nisbatan Jinoyat kodeksining 278-moddasi (Qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atgan. Unga yetti yilgacha qamoq jazosi berilishi mumkin. Tergov harakatlari olib borilmoqda.
Avvalroq Toshkentda onlayn qimor o‘yinlari joylashgan fohishaxona yopilgani haqida xabar berilgandi. Faqat uch oy ichida kazino aylanmasi 900 ming dollarni tashkil etdi.
Izohlar