Rossiyadan 100 ga yaqin bola dam olish uchun O‘zbekistonga keldi
Uchib kelgach, bolalarni nonushta bilan mehmon qilishdi va sovg‘alar topshirishdi.
O‘zbekiston kasaba uyushmalari Federatsiyasi taklifiga binoan Rossiyaning Belgorod va Bryansk viloyatlaridan 99 nafar bola keldi, deb xabar bermoqda elchixona axborot xizmati.
Qayd etilishicha, bolalar deyarli 2 hafta davomida Toshkent viloyati tog‘laridagi “Anor” bolalar sog‘lomlashtirish oromgohida bo‘lib, yangi o‘quv yili boshlanishidan oldin dam olishlari va kuch to‘plashlari mumkin.
Aeroportda ularni Rossiyaning O‘zbekistondagi Muvaqqat ishlar vakili Andrey Lanchikov, O‘zbekiston Kasaba uyushmalari Federatsiyasi rahbariyati va O‘zbekiston Tashqi ishlar vazirligi vakillari kutib oldi.
Uchib kelgach, bolalarni mazali va to‘yimli nonushta bilan mehmon qilishdi va sovg‘alar topshirishdi. Ertasi kuni esa ularni smenaning tantanali ochilish marosimi kutmoqda.
“Birinchi marta o‘tkazilayotgan bunday ajoyib aksiya uchun O‘zbekiston hukumatiga minnatdorchilik bildiramiz, bolalarga esa mehmondo‘st O‘zbekistonda unutilmas ta’til o‘tkazishlarini tilaymiz”, — deyiladi xabarda.
Eslatib o‘tamiz, 2024-yilda O‘zbekiston “Krokus”dagi teraktda jabrlangan rossiyalik yuz nafar bolani oromgohga qabul qilgandi. Marosimda O‘zbekiston bosh vaziri o‘rinbosari Zulayho Mahkamova ishtirok etgan.
Izohlar