Rossiyada mehnat muhojirlari uchun soxta hujjatlar tayyorlagan o‘zbekistonlik sudlandi

Rossiyada mamlakat hududida noqonuniy migratsiyani tashkil etishda ayblangan o‘zbekistonlikka hukm o‘qildi, deb xabar bermoqda Petropavlovsk-Kamchatka shahar sudi matbuot xizmati.

Ma’lumotlarga ko‘ra, erkak Moskvadagi pochta bo‘limlaridan o‘zbekistonlik vatandoshlarning pasportlarini olgan, shundan so‘ng o‘z tanishlari yordamida nazorat-o‘tkazish punktlarining mamlakat davlat chegarasini kesib o‘tganligini tasdiqlovchi soxta sana-shtamplarini qo‘ygan.

Tergov ma’lumotlariga ko‘ra, erkak o‘zining noqonuniy faoliyati bilan 2022-yil iyulidan 2024-yil iyunigacha shug‘ullangan. Shu bilan birga, erkakning sherigi ham bo‘lgan, unga ham huquq-tartibot idoralari tomonidan ayblov e’lon qilingan. Bundan tashqari, huquq-tartibot idoralari xodimlari erkakning nazorat-o‘tkazish punktining soxta ma’lumotlar shtamplari bilan yangi migratsiya kartalarini tayyorlab, keyin ularni Petropavlovsk-Kamchatskiyga yuborganini, u yerda uning sherigi ularni muhojirlarga topshirganini aniqlashga muvaffaq bo‘ldi.

Sudda erkak o‘z aybini to‘liq tan oldi va qilgan ishidan pushaymonligini bildirdi. Sud uni Rossiya Federatsiyasi Jinoyat kodeksining 322-moddasi 1-qismi va 2-qismi “a” bandi (noqonuniy migratsiyani tashkil etish) bo‘yicha aybdor deb topdi va umumiy tartibli koloniyada 1 yil 2 oy muddatga ozodlikdan mahrum qilish jazosini tayinladi.

Avvalroq Rossiyadagi o‘zbekistonlik terrorchilarni moliyalashtirgani xabar qilingandi. Endi ekstremistlar homiysini qamoq va katta jarima kutmoqda.