O‘zbekiston Rossiya TIVga migrantlarga kuch ishlatish reydlari ortidan nota yubordi

O‘zbekiston Rossiya Tashqi ishlar vazirligiga nota yo‘llab, Moskvada migrantlarga qarshi o‘tkazilgan reydlar chog‘ida inson huquqlarining ochiqdan-ochiq buzilishi qayd etilgani yuzasidan izoh talab qildi, deb xabar bermoqda TIV matbuot xizmati.

Ma’lumotlarga ko‘ra, 8-iyun kuni Moskvaning Sokolniki tumanida huquq-tartibot idoralari tomonidan muhojirlar maqomini tekshirish bo‘yicha reyd o‘tkazilgan, huquq-tartibot idoralari xodimlari xorijliklarga nisbatan qo‘pol va kuch ishlatgan. O‘zbekiston Migratsiya agentligi ushbu holatdan “afsusda va xavotirda” ekanini ma’lum qildi.

10-iyun kuni mamlakat Tashqi ishlar vazirligi migratsiya masalalari bo‘yicha Rossiya tomoni bilan navbatdagi uchrashuv o‘tkazdi, unda Rossiya hududida O‘zbekiston fuqarolariga nisbatan asossiz tekshiruvlar, hurmatsiz va qo‘pol munosabatda bo‘linayotganidan xavotir bildirildi. Shuningdek, O‘zbekiston tomoni vakillari bunday hodisalar mamlakatlar o‘rtasidagi do‘stona munosabatlar ruhiga mos kelmasligi va ularning oldini olish bo‘yicha aniq choralar ko‘rishni talab qilishini ta’kidladi.

O‘zbekiston xorijda istiqomat qilayotgan yoki vaqtincha bo‘lib turgan o‘z fuqarolarining huquqlari va qonuniy manfaatlarini himoya qilishga o‘zining ustuvor vazifalaridan biri sifatida qaraydi. Ushbu masala bo‘yicha O‘zbekistonning Moskvadagi elchixonasi ham diplomatik kanallar orqali Rossiya tomoni bilan tegishli muloqotni olib bormoqda.

Shu munosabat bilan O‘zbekiston tomoni Rossiyaning tegishli tuzilmalarini O‘zbekiston fuqarolariga hurmat bilan munosabatda bo‘lishga, ularning sha’ni va qadr-qimmati kamsitilishiga yo‘l qo‘ymaslikka chaqirdi hamda Rossiya Tashqi ishlar vazirligiga inson huquqlarining ochiqdan-ochiq buzilishi qayd etilgan hodisa yuzasidan izoh talab qilib nota yubordi hamda bunday holatlarga yo‘l qo‘yib bo‘lmasligi va Rossiya huquq-tartibot idoralari xodimlarining xatti-harakatlariga huquqiy baho berish zarurligini ta’kidladi.

Vazirlik ushbu vaziyatni kuzatishda davom etishini va zarur hollarda qo‘shimcha choralar ko‘rilishini ma’lum qildi. Xavfsizlik kuchlarining xatti-harakatlaridan jabr ko‘rishi mumkin bo‘lgan fuqarolardan zudlik bilan huquqiy va konsullik yordamiga murojaat qilish so‘ralgan.

Eslatib o‘tamiz, Jurnalistika universiteti rektori Sherzod Qudratxo‘ja ushbu reydlarni “oddiy natsizm” deb atab, O‘zbekiston yoshlarini Rossiyaga ishlash uchun ketmaslikka chaqirgandi. U, shuningdek, vatandoshlarni oilada tug‘ilishni rejalashtirish va bolalarni o‘qitish bilan shug‘ullanishga chaqirdi, shunda ular o‘z vatanida ishlaydi va chet elda tazyiqqa uchramaydi.