Mirziyoyev Trampning tinchlik bo‘yicha Nobel mukofotiga nomzodini qo‘llab-quvvatladi
Prezident, shuningdek, Amerika yetakchisini yana bir bor O‘zbekistonga tashrif buyurishga taklif qildi.
23-sentyabr kuni Shavkat Mirziyoyev va Donald Tramp o‘rtasida muzokaralar bo‘lib o‘tdi, uchrashuv BMT shtab-kvartirasida, O‘zbekiston prezidentining Bosh Assambleyaning 80-sessiyasidagi nutqi oldidan bo‘lib o‘tdi.
Suhbat avvalida davlatimiz rahbari Donald Trampni ichki va tashqi siyosatni amalga oshirishdagi yuksak muvaffaqiyatlari bilan samimiy tabrikladi. Uning o‘tkir xalqaro va mintaqaviy mojarolarni tinch yo‘l bilan hal etish, jumladan, Ozarbayjon va Armaniston o‘rtasida tinchlik o‘rnatishga qo‘shgan shaxsiy hissasi va sa’y-harakatlari alohida qayd etildi.
Siz Nobel mukofotiga har kimdan ko‘ra munosibsiz, bu haqda gapirganmiz va gapiramiz, — dedi Shavkat Mirziyoyev.
Donald Tramp O‘zbekistondagi islohotlarni qo‘llab-quvvatladi va Shavkat Mirziyoyevni o‘z mamlakatining buyuk yetakchisi deb atadi. AQSH Prezidenti O‘zbekiston yetakchisining AQShning 50 dan ortiq yirik kompaniya va banklari rahbarlari bilan o‘tkazgan uchrashuv va muzokaralarining samarali natijalarini, umumiy qiymati 100 milliard dollardan ziyod investitsiya rejalari va loyihalari ishlab chiqilganini yuksak baholadi.
Muzokaralar yakunida Shavkat Mirziyoyev prezident Donald Trampni o‘zi uchun qulay muddatda O‘zbekistonga rasmiy tashrif bilan kelishga yana bir bor taklif etdi.
Avvalroq Donald Tramp sakkiz milliard so‘mga 22 ta Boeing samolyotini sotib olish bo‘yicha kelishuv fonida Shavkat Mirziyoyevni “va’dasining ustidan chiqadigan inson” deb atagandi.
Izohlar