Garvardga chet ellik talabalarni qabul qilish taqiqlandi

AQSHda Garvard universiteti chet ellik talabalarni qabul qilish huquqidan mahrum etildi, deb xabar bermoqda AQSH Ichki xavfsizlik vazirligi matbuot xizmati.

Vazirlik rahbari Kristi Noyem talabalar va almashinuv dasturlari ishtirokchilari uchun dastur bo‘yicha universitet sertifikatini to‘xtatish to‘g‘risida buyruq chiqardi. Garvard endi chet ellik talabalarni qabul qila olmaydi va mavjud chet ellik talabalar ko‘chirilishi yoki qonuniy maqomini yo‘qotishi kerak.

Xabar qilinishicha, Garvard rahbariyati kampusda xavfli muhit yaratgan, bu esa ba’zilarga boshqa shaxslarni, shu jumladan ko‘plab yahudiy talabalarni ta’qib qilish va jismoniy hujum qilish va boshqa yo‘llar bilan uning bir vaqtlar hurmatga sazovor bo‘lgan o‘quv muhitiga xalaqit berish imkonini bergan.

“Universitetlar uchun bu huquq emas, balki imtiyoz — chet ellik talabalarni qabul qilish va o‘zlarining milliardlab mablag‘larini to‘ldirish uchun ularning yuqori to‘lovlaridan foyda olish. Garvardda to‘g‘ri yo‘l tutish uchun ko‘plab imkoniyatlar bor edi. U rad etdi. Ular qonunga rioya qilmagani uchun talabalar va tashrif buyuruvchilar uchun almashinuv dasturi sertifikatidan mahrum bo‘lishdi. Bu butun mamlakat bo‘ylab barcha universitetlar va ta’lim muassasalariga ogohlantirish bo‘lib xizmat qilsin”, — dedi Noyem.

Avvalroq O‘zbekistonda maktab o‘quvchilarini Garvardga o‘qishga tayyorlash boshlanishi haqida xabar berilgandi. Shuningdek, mamlakatda “Prezident iqtidorli farzandlari” milliy dasturi ishga tushiriladi.