Diplomatlar ruhiy kasallikka chalingan o‘zbekistonlikka Rossiya QK bilan shartnomani bekor qilishda yordam berdi
Yigitning ota-onasi Bosh konsulxonaga murojaat qilib, hujjat aldov yo‘li bilan tuzilganini ma’lum qilgan.
O‘zbekistonning Sankt-Peterburgdagi bosh konsulxonasi ruhiy kasallikdan aziyat chekayotgan vatandoshning Rossiya Mudofaa vazirligi bilan harbiy harakatlarda ishtirok etish bo‘yicha shartnomasini bekor qilishga muvaffaq bo‘ldi, deb xabar bermoqda vazirlik matbuot xizmati.
Ma’lumotlarga ko‘ra, o‘zbekistonlik vatandoshi bilan mushtlashib, unga yengil tan jarohati yetkazgani uchun huquq-tartibot idoralari xodimlari qo‘liga tushgan. Leningrad viloyatidagi Kolpino tergov izolyatorida bo‘lganida, qo‘lga olingan shaxs aldov yo‘li bilan Rossiya Qurolli Kuchlarida harbiy xizmatni o‘tash uchun shartnoma imzolagan.
O‘shanda yigitning otasi diplomatlarga murojaat qilib, ushbu shartnomani bekor qilishda tegishli yordam ko‘rsatishni so‘ragan. Shuningdek, erkakning aytishicha, uning o‘g‘li ruhiy kasallikka chalingan. O‘z navbatida, diplomatlar Rossiyaning tegishli idoralariga, jumladan, Leningrad viloyatidagi Inson huquqlari bo‘yicha vakilga so‘rov yuborgan.
Natijada bosh konsulxona xodimlari tuzilgan shartnomani bekor qilishga muvaffaq bo‘ldi va o‘zbekistonlik tergovni davom ettirish uchun tergov izolyatoriga qaytdi. Ayni paytda diplomatlar jinoyat ishi bo‘yicha olib borilayotgan tergov harakatlari doirasida vatandoshimizning huquq va erkinliklari himoyasini ta’minlash bilan shug‘ullanmoqda.
Avvalroq diplomatlar uch nafar farzandi bo‘lgan o‘zbekistonlik ayolga Rossiyadan vatanga qaytishda yordam bergani haqida xabar berilgandi. Mutaxassislar oilaga ma’naviy va moddiy yordam ko‘rsatdi.
Izohlar